Пра гэта піша The New York Times.
Цэнтры кантролю і прафіляктыкі захворваньняў апублікавалі ў сераду тры дасьледаваньні, якія, па словах фэдэральных чыноўнікаў, падаюць доказы таго, што ў найбліжэйшыя месяцы спатрэбяцца бустэрная вакцынацыя (трэцяя доза) супраць каранавірусу.
Але некаторыя экспэрты заявілі, што новае дасьледаваньне не пацьвердзіла рашэньне рэкамэндаваць бустэрныя ін’екцыі для ўсіх амэрыканцаў.
Аргумэнты прыхільнікаў
Узятыя разам, дасьледаваньні паказваюць, што, хоць вакцыны застаюцца высокаэфэктыўнымі супраць шпіталізацыі і сьмерцяў, іх абарона ад заражэньня вірусам за апошнія некалькі месяцаў аслабла.
Гэтая выснова адпавядае раньнім дадзеным зь сямі штатаў, сабранымі на гэтым тыдні The New York Times, якія паказваюць на рост колькасьці прарыўных інфэкцый (у цалкам вакцынаваных) і меншае павелічэньне шпіталізацыі сярод вакцынаваных па меры распаўсюджваньня варыянту Дэльта ў ліпені.
Па словах экспэртаў, зьніжэньне эфэктыўнасьці супраць інфэкцыі можа быць вынікам паслабленьня імунітэту да вакцын, невыкананьня мер засьцярогі, такіх як нашэньне масак, або росту вельмі заразнага варыянту Дэльта, альбо спалучэньня ўсіх трох фактараў.
«Мы занепакоеныя тым, што гэтая тэндэнцыя да зьніжэньня, якую мы назіраем, працягнецца ў найбліжэйшыя месяцы, што можа прывесьці да зьніжэньня абароны ад цяжкіх захворваньняў, шпіталізацыі і сьмерці», — сказаў доктар Вівэк Мурта, галоўны хірург, на брыфінгу ў Белым доме ў сераду.
Спасылаючыся на гэтыя дадзеныя, фэдэральныя чыноўнікі аховы здароўя выклалі плян для амэрыканцаў, якія атрымалі дзьве вакцыны. Плян прадугледжвае рэвакцынацыю праз восем месяцаў пасьля атрыманьня другой дозы, пачынаючы з 20 верасьня.
Аргумэнты скептыкаў
Некаторыя навукоўцы скептычна паставіліся да новай ініцыятывы адміністрацыі ЗША.
«Гэтыя дадзеныя пацьвярджаюць неабходнасьць увядзеньня дадатковых доз вакцыны асобам з аслабленым імунітэтам і жыхарам дамоў састарэлых, а не насельніцтву», — сказала доктар Сэлін Гаўндэр, спэцыялістка па інфэкцыйных хваробах у цэнтры Бэльвю і былая дарадца адміністрацыі па пандэміі.
Паводле яе слоў, бустэры будуць апраўданыя толькі ў тым выпадку, калі вакцыны не змогуць прадухіліць шпіталізацыю з COVID-19.
«Адчуваць сябе хворым, як сабака, і ляжаць у ложку, але не ў шпіталі з цяжкім COVID, гэта не дастаткова важкі чыньнік для кампаніі рэвакцынацыі, — сказала доктарка Гаўндэр. — Мы будзем лепш абароненыя, калі будзем вакцынаваць непрышчэпленых тут і ва ўсім сьвеце».
Няясна, ці дапаможа трэцяя доза людзям, у якіх адсутнічае ўстойлівы імунны адказ на першыя дзьве дозы, сказаў Біл Хэнэдж, эпідэміёляг з Гарвардзкага ўнівэрсытэту.
І рэкамэндацыя бустэрных дозаў таксама можа ў канчатковым выніку падарваць давер да вакцын, папярэдзіў ён:
«Трэцяя прышчэпка ўзмоцніць скептыцызм сярод людзей, якія яшчэ не атрымалі адну дозу, у тым, што вакцыны ім дапамогуць».
Вынікі новых дасьледаваньняў і далейшыя спрэчкі
У сукупнасьці новыя дасьледаваньні паказваюць, што ў цэлым вакцыны маюць эфэктыўнасьць прыкладна 55 адсоткаў супраць усіх інфэкцый, 80 працэнтаў супраць сымптаматычных інфэкцый і 90 працэнтаў або вышэй супраць шпіталізацый, адзначыла Элі Мюрэй, эпідэміёляг з Бостанскага ўнівэрсытэту.
«Гэтыя лічбы на самай справе вельмі добрыя, — сказала доктарка Мюрэй. — Адзіная група, для якой, як сьведаць гэтыя дадзеныя, можна рэкамэндаваць бустэры, на мой погляд, — гэта людзі з аслабленым імунітэтам».
Відавочнае зьніжэньне эфектыўнасьці вакцыны супраць інфэкцыі магло быць выклікана павышаным узьдзеяньнем высокакантагіёзнага варыянту Дэльта ў пэрыяд неабмежаванага сацыяльнага ўзаемадзеяньня, доктарка Мюрэй:
«Гэта здаецца мне рэальнай магчымасьцю, паколькі многія раньнія вакцынаваныя былі матываваныя хутчэй ўбачыць сяброў і сям’ю і вярнуцца да нармальнага жыцьця».
Доктарка Мюрэй кажа, што бустэрная прышчэпка, несумненна, павысіць імунітэт у чалавека, але дадатковая карысьць можа быць мінімальнай — і яе можна так жа лёгка атрымаць, надзеўшы маску або пазьбягаючы абедаў ў памяшканьні і перапоўненых бараў.
Па словах доктаркі Мюрэй і іншых экспэртаў, акцэнт адміністрацыі на вакцыны падарваў важнасьць ўключэньня ў жыцьцё людзей іншых мер засьцярогі, якія былі б зручнымі і ўстойлівымі, а таксама ўмацаваньне магчымасьцяў тэставаньня.
«Гэта збольшага тлумачыць, чаму я думаю, што ўвага адміністрацыі да вакцын так падрывае маральны дух, — дадала яна. — Хутчэй за ўсё, у бліжэйшы час мы ня вернемся да нармальнага жыцьця».
- У адным з трох дасьледаваньняў, вынікі якіх прыводзіць The New York Times, ацэньваліся дадзеныя па штаце Нью-Ёрк з 3 траўня па 25 ліпеня, калі колькасьць заражэньняў варыянтам Дэльта вырасла больш чым на 80 адсоткаў. Дасьледаваньне паказала, што эфэктыўнасьць вакцын у прадухіленьні выпадкаў захворваньня сярод дарослых зьнізілася з 91,7% да 79,8% за гэты час. Але вакцыны заставаліся гэтак жа эфэктыўнымі ў прадухіленьні шпіталізацый.
- На працягу гэтых тыдняў у Нью-Ёрку было зарэгістравана 9 675 выпадкаў прарыўных інфэкцый (г. зн. у тых, хто быў цалкам вакцынаваны) — што склала прыкладна 20 працэнтаў ад агульнай колькасьці выпадкаў у штаце. Было таксама зарэгістравана 1 271 шпіталізацыя сярод цалкам вакцынаваных людзей, што склала 15 адсоткаў усіх шпіталізацый з COVID-19.
