Пра гэта ў The New York Times пішуць тры вядомыя амэрыканскія лекары і навукоўцы — Рашэль Валэнскі, Гарлан Крумгольц і Джэрэмі Фаўст.
Найбольшы цяжар COVID-19 лёг на людзей, старэйшых за 65 гадоў; на іх прыпадае каля 80 адсоткаў сьмерцяў у Злучаных Штатах. Але і маладыя людзі, пішуць лекары, паміраюць гістарычнымі тэмпамі.
У дасьледаваньні, апублікаваным у сераду ў Journal of the American Medical Association, аўтарамі якога зьяўляюцца згаданыя тры лекары, было выяўлена, што сярод дарослага насельніцтва ЗША ва ўзросьце ад 25 да 44 гадоў з сакавіка па канец ліпеня было амаль на 12 000 сьмерцяў больш, чым чакалася, зыходзячы з гістарычных нормаў.
Насамрэч ліпень аказаўся самым сьмяротным месяцам сярод гэтай узроставай групы ў сучаснай гісторыі Амэрыкі. За апошнія 20 гадоў кожны ліпень паміралі ў сярэднім 11 000 маладых амэрыканцаў. Сёлета колькасьць такіх сьмерцяў перавысіла 16 000.
Падобныя тэндэнцыі працягваліся і гэтай восеньню. Зыходзячы з папярэдніх лічбаў, у 2020 годзе прагназавалася, што з гэтай дэмаграфічнай групы памруць каля 154 000 чалавек. Але ЗША перавысілі гэтую колькасьць ужо ў сярэдзіне лістапада. Нават калі паказьнікі сьмяротнасьці раптам вернуцца да нормы ў сьнежні — а вядома, што гэтага не адбудзецца, пішуць аўтары — да канца 2020 году чакаецца больш за 170 тысяч сьмерцяў сярод дарослага насельніцтва ЗША з гэтай дэмаграфічнай групы.
Яшчэ адна праблема, пішуць лекары, — гэта тое, што чарнаскурыя людзі і лацінаамэрыканцы складаюць непрапарцыйна вялікую частку сярод ахвяраў COVID-19. Паводле дадзеных Цэнтраў кантролю і прафіляктыкі хваробаў, сярод дарослых ад 25 да 44 гадоў чарнаскурыя і лацінаамэрыканцы складаюць большасьць тых, хто памёр ад COVID-19 да 30 верасьня.
Паводле дадзеных Нацыянальнага цэнтру статыстыкі аховы здароўя на ўсе сьмерці дарослых ва ўзросьце ад 25 да 44 гадоў прыпадае менш за 3 працэнтаў сьмерцяў ад COVID-19 у Злучаных Штатах. Але тое, што мы раней лічылі COVID-19 параўнальна бясшкодным для маладых людзей, пішуць аўтары, цяпер не пацьвярджаецца новымі дадзенымі.
На думку лекараў, трэба неадкладна зьмяніць інфармацыйную палітыку і рэкамэндацыі. Патрэбна тлумачальная праца ў найбліжэйшыя тыдні і месяцы. Трэба казаць маладым людзям, што яны моцна рызыкуюць, што ім трэба насіць маскі і рабіць больш для сацыяльнага дыстанцыяваньня.
На думку аўтараў артыкулу, гэта яшчэ больш важна цяпер, калі бясьпечныя і эфэктыўныя вакцыны сталі рэальнасьцю. Маладыя, здаровыя людзі не ўваходзяць у сьпіс прыярытэтнай катэгорыі насельніцтва для кампаніі вакцынацыі. Гэта азначае, што зьмена паводзін можа выратаваць тысячы маладых жыцьцяў налета.
