Коратка пра асноўныя падзеі пятніцы 6 лістапада.
Яшчэ 15 беларускіх чыноўнікаў, разам зь Віктарам і Аляксандрам Лукашэнкамі, уключаныя ў санкцыйны сьпіс Эўразьвязу. 2 кастрычніка Эўразьвяз увёў санкцыі супраць 40 беларускіх чыноўнікаў.
Да новых санкцый ЭЗ далучылася Канада, якая раней ужо ўнесла ў сьпіс Лукашэнку з сынам.
Кандыдат у прэзыдэнты ад Дэмакратычнай партыі Джо Байдэн апярэдзіў свайго апанэнта-рэспубліканца і дзейнага прэзыдэнта Дональда Трампа ў Пэнсыльваніі. Падлік працягваецца.
У Беларускім дзяржаўным мэдычным унівэрсытэце пачалі аднаўляць адлічаных студэнтаў.
На адкрыцьці новых станцый менскага мэтро Аляксандар Лукашэнка паабяцаў правесьці новыя прэзыдэнцкія выбары ў Беларусі.
На знак пратэсту супраць ціску, які адміністрацыя БДУ чыніць на студэнтаў і пэдагогаў, звольніўся старшы выкладчык факультэту філязофіі і сацыяльных навук Аляксандар Лазоўскі.
Памкненьне беларусаў да паглыбленьня інтэграцыі з РФ зьніжаецца, — вынікае са шматгадовых дадзеных Інстытуту сацыялёгіі АН Беларусі.
Журналістку, ляўрэатку прэміі ПЭН-цэнтру імя Алеся Адамовіча Насту Захарэвіч асудзілі на 15 дзён арышту.
Журналісту Чудзянцову на закрытым судовым працэсе далі 5,5 года зьняволеньня і штраф $10 тысяч.
Больш за 550 дзеячоў культуры запатрабавалі аднавіць звольненых зорак Опэрнага тэатру.
Палітзьняволеную, сябру прэзыдыюму Каардынацыйнай рады Марыю Калесьнікаву адмовіліся вызваліць пад заклад і падоўжылі арышт да 8 студзеня.
Блогера Эдуарда Пальчыса абвінавацілі па артыкуле «масавыя беспарадкі», яму пагражае да 15 год зьняволеньня.
У Магілёве і Лідзе ўвялі абавязковы масачны рэжым праз пандэмію каранавірусу.
Паводле афіцыйных дадзеных, колькасьць ахвяр каранавірусу ў Беларусі перавысіла 1000 чалавек.
Былы начальнік ДАІ Менскай вобласьці, якога двойчы асуджалі на 15 сутак, заявіў пра катаваньні ў турме на Акрэсьціна.
Адкрыцьцё БелАЭС заплянавалі на 7 лістапада, дзень бальшавіцкага перавароту ў Петраградзе. Лукашэнка хоча збудаваць яшчэ адну АЭС.
На страйкоўцаў з БМЗ завялі крымінальную справу за масавыя беспарадкі.
