Веньямін — новы кіраўнік БПЦ, допыт Латушкі ў СК, пахаваньне Мікіты Крыўцова. Найважнейшае 25 жніўня
Мітрапаліт Павел вызвалены ад пасады Патрыяршага экзарха ўсяе Беларусі. Такое рашэньне прыняў Сьвяты Сынод Рускай праваслаўнай царквы на пасяджэньні ў аўторак у Маскве. Патрыяршым экзархам усяе Беларусі, мітрапалітам Менскім і Заслаўскім прызначаны япіскап Барысаўскі і Мар’інагорскі Веньямін.
Чальцам прэзыдыюму Каардынацыйнай рады для трансфэру ўлады Вользе Кавальковай і лідэру страйкаму МТЗ Сяргею Дылеўскаму прысудзілі па 10 сутак адміністрацыйнага арышту.
У Горадні затрымалі 28 супрацоўнікаў «Гродна Азот».
Сотні чалавек прыйшлі разьвітацца зь Мікітам Крыўцовым. Пахаваньне ўдзельніка акцый пратэсту, якога не маглі знайсьці дзесяць дзён, адбылося ў Маладэчне. 22 жніўня цела Мікіты Крыўцова знайшлі ў лесапарку ў Менску.
Вярхоўны суд адмовіў усім экс-кандыдатам у прэзыдэнты ў задавальненьні скаргаў на вынікі выбараў.
«Стварэньне Каардынацыйнай рады зьяўляецца неканстытуцыйным», — з такой заявай сёньня выступіў старшыня Канстытуцыйнага суду Пётар Міклашэвіч.
Павал Латушка сёньня быў дапытаны ў Сьледчым камітэце як сьведка ў крымінальнай справе па факце старэньня і дзейнасьці Кааардынацыйнай рады. Пасьля допыту Латушка заявіў, што дзейнасьць Каардынацыйнай рады працягнецца.
«Яндэкс» пачаў эвакуацыю супрацоўнікаў беларускага офіса ў Расею.
Сёньня ў Маскве адбыліся перамовы наконт сытуацыі ў Беларусі паміж міністрам замежных справаў Расеі Сяргеем Лаўровым і першым намесьнікам дзяржсакратара ЗША Стывэнам Бігэнам.
Крэмль вітае тое, што беларуская Каардынацыйная рада «не разглядае пытаньне адмовы ад узаемадзеяньня з Расеяй». Пра гэта заявіў прэс-сакратар расейскага прэзыдэнта Ўладзіміра Пуціна Дзьмітры Пяскоў.
