У Адэсе ў ноч на 31 сьнежня дэмантавалі помнік савецкаму паэту, барду і актору Ўладзіміру Высоцкаму. Відэа дэмантажу апублікавалі ў сацсетцы.
Аб рашэньні зьнесьці помнік стала вядома ў канцы верасьня 2024 году. Тады ж гарадскі выканкам Адэсы пастанавіў прыбраць помнікі паэту Аляксандру Пушкіну, пісьменнікам Ісаку Бабелю і Максіму Горкаму.
Помнік Высоцкаму паставілі ў 2012 годзе каля будынка Адэскай кінастудыі, дзе Высоцкі зняўся ў васьмі мастацкіх фільмах, у тым ліку ў карціне «Месца сустрэчы зьмяніць нельга».
Ініцыятыва ўсталяваньня помніка належала былому дэпутату Вярхоўнай Рады Ігару Маркаву. Летам 2022 года яго абвінавацілі ў калябарацыянізме за падтрымку расейскага ўварваньня ва Ўкраіну.
Пасьля расейскага поўнамаштабнага ўварваньня ў лютым 2022-га ва Ўкраіне мяняюць назвы населеных пунктаў, вуліц, сквэраў і паркаў, а таксама прыбіраюць помнікі і мэмарыяльныя дошкі, зьвязаны з Расеяй або Савецкім Саюзам.
