Ганна Соусь, Менск Сёньня ў судзе Ленінскага раёну Менску працягваліся судовыя слуханьні спрэчкі старшыні Лібэральна-дэмакратычнай партыі Беларусі Сергея Гайдукевіча і газэты “Народная Воля” аб абароне гонару і годнасьці. У адпаведнасьці з вынікамі экспэртна-крыміналістычнай экспэртызы, блянк факсавага паведамленьня, надрукаванага ў газэце, выраблены праз мантаж асобных фрагмэнтаў. Пра гэта заявіў супрацоўнік Экспэртна-крыміналягічнага цэнтру Андрэй Ашуркаў, той самы, які ў часе парлямэнцкіх выбараў 2004 году ладзіў графалягічную экспэртызу падпісных лістоў у падтрымку Ўладзімера Навасяда і зрабіў заключэньне аб тым, што ўсе подпісы былі пастаўленыя адной асобай. Уладзімер Навасяд, аспрэчваючы вынікі экспэртызы, прывёў у Вярхоўны суд амаль 25 падпісантаў, якія пацьвердзілі, што самі паставілі подпіс.