(Паганяйла: ) “Дакумэнт па фрагмэнтах, зьвязаных з выкарыстаньнем блянкавай прадукцыі амбасады, сфальсыфікаваны. Але нас цікавяць ня “шапкі”, нас цікавіць зьмест па сутнасьці. Гэта і ёсьць прадмет дасьледаваньня суду”.
У факсавым паведамленьні, надрукаваным у газэце, прыводзіліся словы выканаўцы абавязкаў генэральнага дырэктара Дзяржаўнай кампаніі продажу нафты Іраку Алі Хасана, які нагадваў старшыні ЛДПБ пра пэўныя забавязаньні і прасіў вярнуць доўг амаль 1 мільён даляраў.
Сяргей Гайдукевіч патрабуе праз суд прызнаць несапраўднай і зьневажальнай гэтую інфармацыю, надрукаваную ў “Народнай Волі”, і патрабуе 200 мільёнаў рублёў кампэнсацыі.
Сёньня ж Іосіф Сярэдзіч падаў хадайніцтва аб правядзеньні судова-лінгвістычнай экспэртызы зьместу факсавага паведамленьня, але суд яму ў гэтым адмовіў.
Пры гэтым суд дазволіў дапытаць у часе судовага працэсу спэцыяліста-лінгвіста Аксану Шчарбакову. Паводле яе лінгвістычнага аналізу, у надрукаваным факсе ўтрымліваецца зварот да арганізацыі, а не асабіста да Сяргея Гайдукевіча.
Таксама сёньня галоўны рэдактар “Народнай Волі” падаў хадайніцтвы з тым, каб суд выклікаў у якасьці сьведкаў шэраг асобаў — перакладчыка МЗС Іраку ў 2002 годзе Нуры Хасана, тагачаснага генэральнага дырэктара Дзяржаўнай кампаніі продажу нафты Іраку Садама Зэбэна Хусэйна ды іншых асобаў, датычных да кантактаў Лібэральна-дэмакратычнай партыі Беларусі і спадара Гайдукевіча з ірацкім бокам у час кіраваньня Садама Хусэйна.
Былы намесьнік старшыні ЛДП Мікалай Маркевіч заявіў для Радыё Свабода, што ўдзельнікі судовага працэсу з боку “Народнай Волі” адчуваюць беспрэцэдэнтны ціск.
(Маркевіч: ) “Аказваецца беспрэцэдэнтны маральны ціск. Пра гэта сьведчыць выпадак з адвакатам Пташнікам. Гэтаксама аказваецца ціск на ключавых сьведкаў — Рабатая, Маркевіча ды іншых, якія ведаюць пра Гайдукевіча вельмі шмат і могуць патлумачыць сытуацыю”.
У часе мінулага судовага паседжаньня галоўны рэдактар “Народнай Волі” Іосіф Сярэдзіч адмовіўся ад паслугаў адваката Ўладзімера Пташніка.
***
Судзьдзя Любоў Валевіч не задаволіла ўсе заяўленыя сёньня хадайніцтвы галоўнага рэдактара “Народнай волі” Іосіфа Сярэдзіча. Галоўны рэдактар хадайнічаў аб тым, каб на працэс былі выкліканыя асобы, якія ў 2002 годзе былі сьведкамі кантактаў Лібэральна-дэмакратычнай партыі Беларусі і яе лідэра Сяргея Гайдукевіча з прадстаўнікамі тагачаснага рэжыму Садама Хусэйна. Сёньня ўвечары адбыліся судовыя спрэчкі бакоў. Судовае рашэньне ў гэтай справе будзе агалошанае заўтра а 15-й гадзіне ў Ленінскім судзе Менску.
***
Варта адзначыць, што экспэртызу блянку факсавага паведамленьня, надрукаванага ў “Народнай волі” праводзіў прадстаўнік Экспэртна-крыміналягічнага цэнтру Андрэй Ашуркаў, той самы, які ў часе парлямэнцкіх выбараў 2004 году ладзіў графалягічную экспэртызу падпісных лістоў у падтрымку Ўладзімера Навасяда, які балятаваўся па Менскай Купалаўскай акрузе. Ашуркаў тады зрабіў заключэньне аб тым, што ўсе подпісы былі пастаўленыя адной асобай, і іх прызналі несапраўднымі. Але ж Уладзімер Навасяд, аспрэчваючы вынікі экспэртызы, прывёў у Вярхоўны суд амаль 25 падпісантаў, якія пацьвердзілі, што подпіс і дата былі пастаўленыя імі асабіста. Выкліканы ў суд экспэрт Андрэй Ашуркаў тады прызнаў, што "абсалютна дакладна вынесьці вэрдыкт у гэтай справе можа толькі госпад Бог".