Пра гэта пішуць у адмысловых Telegram-чатах, паведамляе тэлеканал Белсат.
Цяжкасьці на мяжы пачаліся тыдзень таму. Транспартная плынь традыцыйна павялічваецца напярэдадні сьвятаў, але такія чэргі сталіся сапраўднаю нечаканасьцю.
Паводле зьвестак польскіх памежнікаў, цяпер у Тэрэспалі даводзіцца чакаць 20 гадзінаў, каб трапіць у Беларусь. Аўтобусаў у чарзе няма.
«Агулам 61 гадзіна. Усім моцы і цярплівасьці ў гэтай дзікасьці», — пішуць у Telegram-чатах беларусы, якія сёньня мінулі мяжу праз Берасьце, і заклікаюць «заставацца людзьмі ў любой сытуацыі».
Уначы аўтобусы агулам праходзілі кантроль за 11 гадзінаў.
У такіх чэргах нэрвы шмат у каго не вытрымлівалі. Як паведамлялася, людзі скандалілі, ладзілі «дзяжурства», каб не пускаць «улезуноў», нават здараліся бойкі, некаторыя ж прадавалі свае месцы ў чарзе.
Пры гэтым іншыя асобы падаюць прыклад салідарнасьці. Сёньня ў чаце з’явілася абвестка аб прапанове бясплатнай ежы і гарачых напояў у Тэрэспалі.
Намесьнік кіраўніцы Аб’яднанага пераходнага кабінэту, старшыня НАУ Павел Латушка ў сваім Telegram-канале паведаміў, што папрасіў польскія службы спрыяць беларусам, якія чакаюць на мяжы.
«Паводле нашых зьвестак, чарга сфармавалася праз наўмыснае стрымліваньне афармленьня на ўезд у Беларусь памежнымі і мытнымі службамі рэжыму Лукашэнкі», — напісаў Латушка.
На памежных пераходах з боку Літвы сітуацыя падобная. Тыя, хто сёння мінуў мяжу праз пункт «Шальчынінкай — Беняконі», пішуць, што прачакалі 47 гадзінаў. Больш за 40 гадзінаў — у чарзе перад пераходам «Мядзінінкай — Каменны Лог», у пункце «Лаворышкес — Катлоўка» — 37 гадзінаў.
Праходжанне праз адзіны пункт на мяжы з Латвіяй, «Патэрніекі — Грыгораўшчына», займае 36 гадзінаў.
На выезд зь Беларусі, паводле звестак Дзяржаўнага памежнага камітэту на 14:00, няма чэргаў ані легкавікоў, ані аўтобусаў.
