Дэпутаты парлямэнту Грузіі прагаласавалі за выключэньне з разгляду праекту закону аб агентах замежнага ўплыву, пасьля ўхваленьня якога ў першым чытаньні ў Тбілісі пачаліся масавыя акцыі пратэсту.
Як паведаміў Першы тэлеканал Грузіі, дэпутаты парлямэнту адхілілі разгляд праекту закону ў другім чытаньні. Менавіта такая працэдура прадугледжана ў рэглямэнце грузінскага парлямэнту, каб выключыць дакумэнт з разгляду. Праект адпаведнага рашэньня ініцыявала група «Сіла людзей», яго ўключылі ў парадак дня без абмеркаваньня. Разгляд праекту закону ў другім чытаньні падтрымаў толькі адзін дэпутат, 35 выступілі супраць. Усяго на галасаваньне зарэгістраваліся 112 дэпутатаў.
Кіроўная партыя «Грузінская мара», ініцыятар законапраекту, грамадзкі рух «Сіла народу» і парлямэнцкая большасьць 9 сакавіка заявілі аб часовым адкліканьні законапраекту і намеры зладзіць сустрэчы з выбарнікамі, каб тлумачыць ім важнасьць такога закону.
Парлямэнт Грузіі 7 сакавіка прыняў у першым чытаньні законапраект «Аб празрыстасьці фінансаваньня вонкавага ўплыву», які таксама называюць «законам аб агентах іншаземнага ўплыву». З 150 дэпутатаў 76 прагаласавалі за прыняцьце закону, 13 — супраць, яшчэ 61 не галасаваў.
Законапраект абавязваў усіх юрыдычных і фізычных асоб, якія атрымліваюць фінансаваньне з-за мяжы, рэгістравацца ў спэцыяльным рэестры. У адваротным выпадку парушальнікам пагражае буйны штраф або турэмнае зьняволеньне тэрмінам на пяць гадоў.
Апазыцыя сьцьвярджала, што закон мае на мэце прыцясьненьне іншадумства і грамадзянскай актыўнасьці, як гэта адбылося ў Расеі. Таксама яны адзначылі, што прыняцьце такога закону зьяўляецца пагрозай для дэмакратыі і будзе перашкаджаць інтэграцыі Грузіі ў Эўропу.
