Эўрапейскі парлямэнт у чацьвер ухваліў рэзалюцыю, у якой заклікаў краіны ЭЗ зьняць абмежаваньні на прымяненьне Ўкраінай зброі, якая імі пастаўляецца, для ўдараў па законных вайсковых цэлях на тэрыторыі Расеі.
У падтрымку дакумэнту, які мае рэкамэндацыйны характар, выказаліся 425 дэпутатаў Эўрапарлямэнту, 131 быў супраць і 63 устрымаліся.
Як гаворыцца ў тэксьце рэзалюцыі, калі абмежаваньні ня будуць зьнятыя, Украіна ня зможа ў поўнай меры карыстацца сваім правам на самаабарону і застанецца ўразьлівай перад расейскімі атакамі, у тым ліку на цывільныя аб’екты. Таксама ў рэзалюцыі выказваецца занепакоенасьць у сувязі з падзеньнем аб’ёмаў вайсковай дапамогі Ўкраіне ад краін ЭЗ. У дакумэнце асобна зьмяшчаецца заклік паставіць Кіеву ракеты Taurus — Нямеччына неаднаразова адмаўлялася гэта рабіць.
Краіны — сябры ЭЗ і саюзьнікі па NATO, лічаць дэпутаты Эўрапарлямэнту, павінны «ўзяць на сябе абавязаньні падтрымліваць Украіну ў вайсковых адносінах, выдзяляючы ня менш як 0,25 працэнта свайго ВУП у год».
Таксама дэпутаты Эўрапарлямэнту заклікаюць пашырыць санкцыі, як у дачыненьні да Расеі і Беларусі, так і супраць Ірану і Паўночнай Карэі, — гэтыя краіны дэпутаты абвінавацілі ў пастаўках зброі Расеі. Таксама зьмяшчаецца заклік уключыць у санкцыйныя сьпісы больш кітайскіх грамадзян і кампаній у сувязі зь іх роляй у абыходзе санкцый. У рэзалюцыі таксама гаворыцца пра неабходнасьць падрыхтаваць прававую базу для канфіскацыі расейскай дзяржаўнай уласнасьці ў краінах ЭЗ. У санкцыйны сьпіс прапануецца ўнесьці «Газпрам», таксама прапануецца забараніць закупкі ў Расеі звадкаванага прыроднага газу і ядзернага паліва. Падобныя ініцыятывы Эўрапарлямэнт выказваў ужо ня раз, але пакуль гэтыя санкцыі ўведзеныя не былі.
Як адзначае «Настоящее время», шэраг краін Эўропы раней дазволілі Ўкраіне выкарыстоўваць пастаўленую імі зброю для нанясеньня ўдараў па цэлях на тэрыторыі Расеі. Вярхоўны прадстаўнік ЭЗ па замежных справах Жузэп Бурэль заявіў, што кожная краіна Эўразьвязу будзе самастойна прымаць рашэньне аб зьняцьці абмежаваньняў на ўдары па Расеі, бо ня ўсе пастаўляюць Кіеву дальнабойную зброю. Асноўныя дэбаты, аднак, цяпер ідуць аб выкарыстаньні дальнабойных ракет, пастаўленых Украіне ЗША і Вялікай Брытаніяй — абедзьве гэтыя краіны не ўваходзяць у ЭЗ.
У Маскве на рэзалюцыю Эўрапарлямэнту адрэагаваў кіраўнік Дзяржаўнай Думы Вячаслаў Валодзін, які заявіў, што «тое, да чаго заклікае Эўрапарлямэнт, вядзе да сусьветнай вайны з выкарыстаньнем ядзернай зброі», і адзначыў, што «да Страсбурга падлётны час ракеты „Сармат“ — 3 хвіліны 20 сэкундаў».
- Прэзыдэнт Расеі Ўладзімір Пуцін раней сьцьвярджаў, што ў выпадку, калі краіны NATO дазволяць Украіне ўдары па Расеі дальнабойнай зброяй, NATO апынецца фактычна ў стане вайны з Расеяй.
- Генэральны сакратар NATO Енс Столтэнбэрг адзначыў, што Пуцін і раней пагражаў у выпадку перасячэньня так званых «чырвоных ліній», але гэтыя пагрозы не матэрыялізаваліся, і падкрэсьліў, што сам па сабе дазвол не азначае ўдзелу NATO ў вайне.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум