Хадайніцтвы з асабістай парукай за Віктара Бабарыку, каб яго выпусьцілі з-пад варты, падпісалі больш за 30 чалавек, нягледзячы на затрыманьні тых, хто хацеў гэта зрабіць, паведамляе Tut.by з спасылкай на адвакатаў Бабарыкі.
У тым ліку хадайнічалі за Бабарыку нобэлеўская ляўрэатка Сьвятлана Алексіевіч, знаны дызайнэр і мастак Уладзімер Цэсьлер і дырэктарка дабрачыннага фонду дапамогі дзецям «Шанец» Натальля Маханько.
Паводле адвакатаў Дзьмітрыя Лаеўскага і Аляксандра Пыльчанкі, Віктар Бабарыка толькі 31 ліпеня даведаўся пра затрыманьні людзей каля КДБ і быў абураны і шакаваны гэтай навіной.
«У той жа час Віктар Дзьмітрыевіч выказаў вялізную падзяку ўсім людзям за такую падтрымку — найперш тым, хто прыйшоў падаць хадайніцтва, і ў асаблівасьці тым, хто беспадстаўна пацярпеў за рэалізацыю законнага права», — сказалі адвакаты.
Адвакаты таксама паведамілі, што ў Віктара Бабарыкі ёсьць праблемы з атрыманьнем пітной вады, якую ён замаўляе з крамы СІЗА.
Паводле праваабарончага цэнтру «Вясна», каля КДБ 28 ліпеня затрымалі 12 журналістаў і 36 грамадзян, якія спрабавалі падаць хадайніцтвы.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
