Міністэрства адукацыі Беларусі адзначыла, што «ў сувязі з эпідэміялягічнай абстаноўкай» шматлікія пункты правядзеньня рэпэтыцыйнага тэставаньня скасавалі тэсты, заплянаваныя на травень. Таму прайсьці тэсты дадуць на сайце Рэспубліканскага інстытуту кантролю ведаў.
Каранавірус у Беларусі і ў сьвеце. Як разьвіваюцца падзеі >>
Рэпэтыцыйнае інтэрнэт-тэставаньне будуць праводзіць ад 19 траўня па ўсіх 15 прадметах, прадстаўленых на ЦТ. Для ўдзелу трэба заплаціць або падаць чэкі аб аплаце скасаваных сэансаў РТ. Калі завершаць інтэрнэт-РТ, не паведамляюць — толькі пішуць, што яно будзе ісьці «дастаткова працяглы час».
Само ЦТ не адмяняюць і не пераносяць у інтэрнэт «у сувязі з эпідэміялягічнай абстаноўкай», але адкладаюць на 12 дзён: першы тэст будзе толькі 25 чэрвеня.
Тэставаньне па прадметах, на якія запісваецца найбольш абітурыентаў (прыкладам, расейская мова ці матэматыка), падзеляць на 2 дні, тэсты першага і другога дня будуць рознымі. Міністар падкрэсьліў, што парадку атэстацыі ніхто не мяняў.
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
