Міністар адукацыі сказаў, што асобных школьнікаў могуць атэставаць онлайн

14 травень 2020, 21:55

Міністар адукацыі Ігар Карпенка 14 траўня ў эфіры тэлеканалe «Беларусь 1» паведаміў, што настаўнікі на месцах будуць самі вызначаць, у якім фармаце атэставаць школьнікаў у канцы году.

Паводле Карпенкі, Мінадукацыі прадугледзела розныя спосабы правядзеньня атэстацыі. У школах ведаюць, як яе праводзіць у залежнасьці ад паралелі, спэцыфікі навучальнага працэсу і наведвальнасьці вучнямі. Школьніка могуць атэставаць онлайн, калі настаўнік бачыў яго онлайн-працу, а цягам году з гэтым вучням «не ўзьнікала ніякіх пытаньняў».

«Пытаньне ў чыста тэхналягічных аспэктах. Схема ёсьць, парадак атэстацыі ніхто не адмяняў. Зноў жа кожны настаўнік ведае сваіх падапечных, зь кім ён займаецца. Ён ацэніць у цэлым, як вучань цягам году паказваў якія веды», — сказаў Карпенка.

Паводле яго словаў, калі ўзьнікне спрэчная сытуацыя, яе можна вырашыць з дапамогай сустрэч-кансультацый. Іх будуць праводзіць пасьля заняткаў ці па суботах. Міністар адзначыў, што атэстуюць усіх.

Што трэба ведаць пра новы каранавірус, які выклікае COVID-19

Невядомы раней вірус выявілі ў кітайскім горадзе Ўхань у сьнежні 2019 году.
Афіцыйнай назвай хваробы ад новага каранавірусу з Кітаю стала COVID-19 (coronavirus disease).
Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.