Падчас прэс-канфэрэнцыі 7 траўня кіраўнік эўрапейскага аддзяленьня Сусьветнай арганізацыі здароўя (WHO) Ганс Клюге назваў Дзень перамогі «вельмі важным днём»: ён заклікаў знайсьці «альтэрнатыўня рашэньні» для сьвяткаваньня, каб «не рызыкаваць чалавечымі жыцьцямі».
Каранавірус у Беларусі і ў сьвеце. Як разьвіваюцца падзеі >>
Паводле Клюге, сытуацыя ва Ўсходняй Эўропе выклікае занепакоенасьць: колькасьць новых выпадкаў COVID-19 за апошні тыдзень вырасла ў Беларусі, Казахстане, Расеі і Ўкраіне. Правядзеньне масавых мерапрыемстваў цяпер можа справакаваць новую ўспышку захворваньняў.
Клюге дадаў, што хоча адзначыць тыя ўрады, якія прынялі «адважнае рашэньне» адкласьці або перанесьці парады і «паставілі здароўе людзей на першае месца», а таксама адзначыў, што рэгіянальны офіс WHO ставіцца да Дня перамогі зь вялікай павагай, таму заклікае знайсьці альтэрнатыўныя варыянты адзначэньня.
У Беларусі па-ранейшаму плянуюць правесьці парад 9 траўня ў Менску, ад 11.00. Гэнэральная рэпэтыцыя параду пачнецца 8 траўня а 21:00.
Місія Сусьветнай арганізацыі здароўя і Пастаянная каардынатарка Арганізацыі аб’яднаных нацыяў у Беларусі заклікалі беларускія ўлады зрабіць неадкладныя новыя захады супраць эпідэміі: перанесьці або скасаваць масавыя мерапрыемствы, даць магчымасьці для дыстанцыйнай працы і адукацыі, закрыць забаўляльныя ўстановы і скараціць «неістотныя перасоўваньні» людзей. У Брусэлі кажуць, што Беларусь атрымае дапамогу ў барацьбе з COVID-19 толькі тады, калі будзе выконваць рэкамэндацыі Сусьветнай арганізацыі здароўя.
Аляксандар Лукашэнка тым часам заяўляе, што «асабліва ня парыцца» з нагоды выяўленых выпадкаў каранавірусу. Рост пнэўманіяў у Беларусі ён лічыць «мізэрам». Лукашэнка адмаўляецца скасаваць вайсковы парад на 9 траўня, нават пасьля таго, як ад удзелу ў тым парадзе адмовіліся вайскоўцы з Расеі і Кітаю, шэраг расейскіх палітыкаў. Таксама Лукашэнка ня робіць тэст на каранавірус, хоць працягвае наведваць публічныя мерапрыемствы і асабіста сустракаецца з чыноўнікамі, ціснуць рукі пры сустрэчы.
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
