Дзесяць праваабарончых арганізацыяў Беларусі апублікавалі 6 траўня супольны ліст за скасаваньне параду на Дзень Перамогі, а таксама яго рэпэтыцыяў, праз рызыкі для здароўя ўдзельнікаў і гледачоў.
Каранавірус у Беларусі і ў сьвеце. Як разьвіваюцца падзеі >>
Заяву падпісалі «Беларускі дакумэнтацыйны цэнтар», «Зьвяно», «Ідэнтычнасьць і права», «Прававая дапамога насельніцтву», «Прававая ініцыятыва», камітэт «Салідарнасьць», «ТаймАкт», Цэнтар прасоўваньня правоў жанчынаў «Яе правы», Human Constanta і Lawtrend.
Праваабаронцы спасылаюцца на рэкамэндацыі Сусьветнай арганізацыі здароўя і на Канстытуцыю Беларусі. Артыкул 45 Канстытуцыі гарантуе грамадзянам праву на ахову здароўя, а вайсковы парад у час пандэміі каранавірусу, пішуць праваабаронцы, дае «высокую рызыку неналежнага забесьпячэньня гэтага права».
У заяве таксама адзначаюць зьяўленьне публікацыяў пра прымус студэнтаў і дзяржаўных службоўцаў да ўдзелу ў парадзе, што супярэчыць артыкулу 21 Міжнароднага пакту аб грамадзянскіх і палітычных правах.
Праваабаронцы бачаць у парадзе:
- рызыку заражэньня вайскоўцаў у сувязі з працяглым бессымптомным пэрыядам COVID-19, у тым ліку рызыку распаўсюду вірусу на рэпэтыцыях параду;
- рызыку заражэньня вэтэранаў, якія праз узрост і так пад падвышанай пагрозай, а могуць аказацца сярод людзей без належнай дыстанцыі і сродкаў засьцярогі;
- рызыку для ўсіх наведнікаў з прычыны немагчымасьці належнай дыстанцыі між імі.
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
