Кіеў. Эўрамайдан. Галоўнае за 23 студзеня
Як прайшоў мінулы дзень у Кіеве.Ня гледзячы на заяву прэм'ер-міністра Азарава, што «сытуацыя ў Кіеве пад абсалютным кантролем», ніхто не бярэцца прадказаць, чым скончыцца супрацьстаяньне.
Большую частку чацьвярга ў цэнтры Кіева панавала замірэньне, абвешчанае на час перамоваў апазыцыі і прэзыдэнта Януковіча. Апазыцыя выставіла Януковічу ультыматум.
Затое ў абласных гарадах Украіны натоўп людзей штурмаваў абласныя адміністрацыі. І сям-там пасьпяхова.
Акцыі салідарнасьці з Майданам адбыліся ў беларускіх гарадах. У Менску актывістаў затрымала міліцыя.
На гібель на Эўрамайдане беларуса Жызьнеўскага адгукнулася Рада БНР.
Дзятліковіч з Кіеву: Чым скончыцца, ніхто не бярэцца прагназаваць
Беларускі журналіст Віктар Дзятліковіч апошнія дні працуе ў самых гарачых пунктах кіеўскага процістаяньня.
Дзятліковіч: Цяпер на Майдане ўсе чакаюць вынікаў сёньняшняга раўнду перамоваў паміж ўладай і трыма лідэрамі апазыцыі. Але, зь іншага боку, мы ведаем, што частка апазыцыі, перш за ўсё «Правы сэктар», не разглядаюць Клічка, Яцэнюка і Цягнібока як сваіх лідэраў, гэтыя апазыцыянэры, фактычна, ня маюць на правых уплыву, і тое, што тыя пагадзіліся на часовае спыненьне сваіх дзеяньняў – гэта зь іх боку акт добрай волі, а не прызнаньне, што тры названыя апазыцыянэры зьяўляюцца аўтарытэтамі для іх.
Я параўноўваю свае ўражаньні ад падзеяў на Грушэўскага з учорашнім днём. Цяпер тут ціха. А ўчора было ўражаньне калі не вайны, то яе пачатку. Гэта моцна адрозьніваецца: бачыце вы гэта на свае вочы ці ў тэлевізары ці ў інтэрнэце. Калі знаходзіцеся ў натоўпе людзей, якія закідваюць «Бэркут» кактэйлямі Молатава і камянямі, у вас адчуваньне, што краіна знаходзіцца на мяжы грамадзянскай вайны. Зь іншага боку, як толькі адыходзіш на сто мэтраў ад Грушэўскага ці Майдану, фактычна, трапляеш у мірнае жыцьцё.
Чытаць далей...
Клічко і Цягныбок аб'явілі пра перамір'е з уладамі
Лідэры партый УДАР Віталь Клічко і «Свабода» Алег Цягныбок, якія сёньня прымалі ўдзел у перамовах у адміністрацыі прэзыдэнта Віктара Януковіча, выступілі пасьля гэтай сустрэчы позна ўвечары перад удзельнікамі супрацьстаяньня на вуліцы Грушэўскага ў Кіеве.Чытаць далей...
У некаторых рэгіёнах Украіны апазыцыя захапіла ўрадавыя будынкі
У некалькіх абласных цэнтрах Украіны ў сераду штурмавалі будынкі органаў улады, адбыліся сутычкі з праваахоўнікамі.
Чытаць далей...
Апазыцыя абвясьціла Грушэўскага тэрыторыяй Майдану
Дзень прамір’я ў Кіеве
«Рашэньне прынятае. Мы аб’яўляем Грушэўскага тэрыторыяй Майдану, — сказаў Яцанюк. — Ні кроку назад».
Апазыцыя абвясьціла вуліцу Грушэўскага, дзе ад 19 студзеня працягваецца вострае супрацьстаяньне паміж мітынгоўцамі і сілавікамі, тэрыторыяй Майдана. Пра гэта са сцэны галоўнай плошчы сталіцы заявіў лідэр парлямэнцкай фракцыі «Бацькаўшчына» Арсень Яцанюк.
«Рашэньне прынятае. Мы аб’яўляем Грушэўскага тэрыторыяй Майдану, — сказаў Яцанюк. — Ні кроку назад. Я прашу ўсіх — дысцыпліна. Гэта падтрымліваеце? Дакладнае выкананьне загадаў. Гэта падтрымліваецца? Ці пашыраем мы тэрыторыю Майдану? Зьвяртаюся да Андрэя Парубія пашырыць тэрыторыю Майдану».
У чацьвер пасьля перамоваў у адміністрацыі прэзыдэнта апазыцыйныя лідэры, выступаючы перад мітынгоўцамі на Грушэўскага і на майдане Незалежнасьці, заявілі аб дамоўленасьці зь Януковічам аб спыненьні сілавога супрацьстаяньня і вызваленьні ўсіх затрыманых на Грушэўскага. Па словах лідэра «Удару» Віталя Клічко, прэзыдэнт паабяцаў, што ўсіх затрыманых адпусьцяць на працягу трох дзён. Са свайго боку, пратэстоўцы таксама павінны ўстрымлівацца ад ужываньня сілы.
Такую заяву апазыцыі пратэстоўцы ўспрынялі неадназначна. Частка зь іх сустрэла гэта паведамленьне свістам і крыкамі «Ганьба».
Міліцыя абяцае не чапаць дэманстрантаў, калі яны сыдуць з Грушэўскага
Міністар унутраных справаў Віталь Захарчанка заявіў у ноч на пятніцу, што, калі прысутныя на вуліцы Грушэўскага ў Кіеве прымуць прапанову Генэральнай пракуратуры і пакінуць «небясьпечную тэрыторыю», органы ўнутраных спраў не ажыцьцявяць ніякіх захадаў адносна перасьледу гэтых людзей.
«Акрамя таго, гарантую, што міліцыя ня будзе прымаць сілавых дзеяньняў па вызваленьні майдану Незалежнасьці», — цытуе міністра прэс-служба МУС.
Чытаць далей...
Лідэраў апазыцыі асьвісталі і вымусілі прыслухацца да Майдану
Сустрэча ўладаў і парлямэнцкай апазыцыі, якая праходзіла ў сераду больш за чатыры гадзіны — прайшла безвынікова. Паводле Віталя Клічко, улады пагадзіліся вызваліць затрыманых на Грушэўскага людзей толькі пры ўмове спыненьня сілавых дзеяньняў. Актыўныя ўдзельнікі супраціву ўспрынялі гэтыя словы воклічамі незадаволенасьці. Таму лідэры апазыцыі абвясьцілі пра тое, што вуліца Грушэўскага становіцца часткай Майдану. Між тым, улады раней выказалі незадаволенасьць тым, што апазыцыя не асудзіла дзеяньні экстрэмістаў.
Пасьля заканчэньня перамоваў Віталь Клічко і Алег Цягнібок пайшлі не на Майдан, а на вуліцу Грушэўскага, дзе працягвалася перамір’е. Апазыцыянеры распавялі, што ўлады пагадзіліся зьмяніць меру стрыманьня для затрыманых актывістаў пратэсту, а МУС — не ўжываць агнястрэльную зброю (хоць да гэтага часу ўжываньне агнястрэльнай зброі з боку ўлады адмаўлялася). А ў наступны аўторак парлямэнт разгледзіць вылучаныя пратэстоўцамі патрабаваньні: у прыватнасьці, адстаўку ўраду і амністыю для ўдзельнікаў закалотаў.
Аднак улады вылучылі таксама свае ўмовы — спыненьне сілавых дзеяньняў і стварэньне буфэрнай зоны паміж актыўнымі ўдзельнікамі супраціву і працаўнікамі МУС. Фактычна, актывісты маюць пакінуць барыкады і адступіць з вуліцы Грушэўскага. Таму сярод актывістаў супраціву было шмат незадаволеных тым, што апазыцыйныя лідэры, не дасягнуўшы рэальных вынікаў, заклікаюць падоўжыць перамір’е.
Пасьля на майдане Незалежнасьці Віталь Клічко прызнаў, што многім яго выступ не спадабаецца. Ён прызнаў, што ўлады вядуць перамовы несумленна, але адзначыў, што перамовы варта працягваць — каб не праліць кроў. Затое лідэр «Удар» заклікаў да страйку.
Алега Цягныбока, які распавядаў аб хадзе перамоваў, пачалі досыць гучна абсьвістваць. Алег Цягныбок заклікаў вызначыцца — ладзіць далей супраціў ці пагадзіцца на перамір’е. Большасьць удзельнікаў мітынгу прагаласавалі за супраціў. Таму Арсень Яцанюк абвясьціў аб тым, што барыкады на вуліцы Грушэўскага становяцца тэрыторыяй Майдану.
«Рашэньне прынятае. Мы аб’яўляем Грушэўскага тэрыторыяй Майдану, — сказаў Яцанюк. — Ні кроку назад. Я прашу ўсіх — дысцыпліна. Гэта падтрымліваецца? Дакладнае выкананьне загадаў. Гэта падтрымліваецца? Або пашыраем мы тэрыторыю Майдана? Зьвяртаюся да Андрэя Парубія пашырыць тэрыторыю Майдану».
Раней міністар юстыцыі Олэна Лукаш, якая ўваходзіць у працоўную групу па ўрэгуляваньні палітычнага крызісу, заявіла аб працягу перамоваў. Яна таксама выказала шкадаваньне з нагоды таго, што «лідэры апазыцыі адмовіліся асудзіць экстрэмісцкія дзеяньні».
На Майдане протестуют около 20 тыс. активистов, еще 6 - на баррикадах. В Мариинском парке 8 тыс. Беркута: перемирие продолжается #євромайдан
— Євромайдан (@Dbnmjr) January 24, 2014
Сейчас, возле моста на Институтской #евромайдан #Євромайдан pic.twitter.com/bqQwosJFoX
— Євромайдан (@Dbnmjr) January 24, 2014
Студэнтка, якая ўдзельнічала ў штурме дзяржбудынкаў, — без прытомнасьці ў крытычным стане
Пад Чаркаскай абласной адміністрацыі падчас штурму памяшканьня пацярпела студэнтка аднаго зь мясцовых ВНУ, якую ўжо праапэравалі. Яе стан ацэньваюць як крытычны. Пра гэта на сваёй старонцы ў Facebook паведаміў экс-мэр Чаркасаў Сяргей Адарыч, піша «Украінская праўда».
Дзяўчыне на галаву кінулі кветкавы вазон з 4-га паверху.
«Кантактаваў зь лекарамі. Дзяўчыну праапэравалі. Стан крытычны. Ня менш за тыдзень будзе без прытомнасьці. Пра дынаміку можна будзе казаць толькі праз два дні», — адзначыў ён.
Чытаць далей...
RT @Dbnmjr: После ухода Кличко с Грушевского, кол-во беркута стало значительно увеличиваться #Євромайдан #евромайдан
— Радыё Свабода (@svaboda) 24.1.2014
RT @Matteush: у Тернопіль люди відбили у влади ОДА і ночують в ній, щоб зранку переобрати керівництво і не дати міліції прорватися всередин…
— Радыё Свабода (@svaboda) 24.1.2014
Імем загінулага беларуса зьбіраюцца назваць вуліцу ў Львове
Львоўская «Свабода» прапанавала прысвоіць званьне «Ганаровы грамадзянін горада» пяці загінулым удзельнікам сутычак у Кіеве і выплаціць матэрыяльную дапамогу іх сем’ям у памеры 5000 эўра.
Як піша сайт ВА «Свабода», Львоўскай гарадзкой радзе прапануецца прысвоіць званьне «Ганаровы грамадзянін горада» пяці загінулым — Сяргею Нігаяну, беларусу Міхаілу Жызьнеўскаму, львавяніну Юрыю Вярбіцкаму і яшчэ двум неапазнаным асобам — і ўсталяваць матэрыяльную дапамогу ў памеры 50 000 грн сем’ям загінулых.
Гэтую прапанову ад імя 55 дэпутатаў агучыў намесьнік кіраўніка фракцыі «Свабода» ў Львоўскай гарадзкой радзе Любамір Мельнічук.
Паколькі «Свабода» мае бальшыню ў мясцовай Радзе, а большасьць дэпутатаў цяпер знаходзяцца ў Кіеве, Мельнічук прапанаваў супольнасьці горада прагаласаваць за прапанаваны праект рашэньня.
«Супольнасьць горада аднадушна ў сваім імкненьні годна ўшанаваць памяць загінулых герояў і матэрыяльна падтрымаць іх сем’і. Такім чынам, наш наступны крок — мы перадаём рашэньне на выкананьне мэру Львова Андрэю Садоваму», — адзначыў Любамір Мельнічук.
У Роўна і Львове каля захопленых адміністрацыяў узьвялі барыкады #євромайдан #евромайдан
— Радыё Свабода (@svaboda) 24.1.2014
Дэманстранты ў Кіеве захапілі Міністэрства аграпалітыкі
Некалькі дзясяткаў актывістаў Майдана захапілі будынак Міністэрства аграпалітыкі, які знаходзіцца на Храшчаціку, недалёка ад Майдану Незалежнасьці.
Як паведамляе ТСН, мітынгоўцы забарыкадаваліся ў будынку. Актывісты кажуць, што занялі будынак урадавага ведамства, каб пагрэцца. Яны выбілі шыбы каля парадных дзьвярэй. Уваход у будынак ахоўваецца.
Невялікая група дэманстрантаў зайшла ў суседні ўваход гэтага ж будынку па адрасе Храшчацік, 24.
Футбольныя фанаты Ўкраіны яднаюцца супраць ўлады
Фанаты 22 футбольных клюбаў Украінскай прэм’ер-лігі аб’ядналіся ў барацьбе супраць улады сваёй краіны.
Фанаты «Дняпра» ўжо заўтра (мова йдзе пра 24 студзеня—Рэд.) сустрэнуцца з аднымі са сваім галоўных ворагаў — ультрас «Шахцёра» і разам едуць у Кіеў.
На 20.00 25 студзеня прызначаны масавы збор усіх ультрас Украінскай лігі, паведамляюць у сацыяльнай сетцы «УКантакце».