Дата дня
10 студзеня 1990 году адбыліся першыя заняткі ліцэю Беларускага дзяржаўнага ўнівэрсытэту. Ліцэй БДУ быў заснаваны ў 1989 годзе, ён забясьпечвае профільнае навучаньне ў 10–11-х клясах, рыхтуе да паступленьня ў ВНУ. Яго вучні рэгулярна становяцца прызэрамі рэспубліканскіх і міжнародных алімпіяд у самых розных прадметах. У 2004 годзе ліцэю далі прэмію ўраду за дасягненьні ў галіне якасьці.
У 2020 годзе больш за тысячу выпускнікоў установы падтрымалі свабодныя выбары. Пасьля выбараў зь ліцэю звольнілі больш за дзясятак выкладчыкаў, за гэты час зьмяніліся тры дырэктары.
У кастрычніку 2023 году кіраваць ліцэем БДУ прызначылі Тацяну Мамчыц, начальніцу вучэбна-мэтадычнай часткі Інстытуту нацбясьпекі (у савецкія часы — школа КДБ). У траўні 2024 году ў Ліцэі БДУ адкрылі дошкі ў гонар Лукашэнкі, а ў чэрвені — прысвоілі ліцэю імя заснавальніка ВЧК-КГБ Дзяржынскага.
Дзень у гісторыі
1569 — у Люблінскім замку пачалося паседжаньне сэйму, якое папярэднічала Люблінскай уніі.
1863 — у Лёндане пачало працаваць першае ў сьвеце мэтро.
1946 — у Лёндане пачалася першая сэсія Генэральнай асамблеі ААН.
1989 — пасьля 72-гадовага перапынку пачала працаваць Менская духоўная вучэльня — спачатку як аднагадовыя курсы псаломшчыкаў.
1991 — прэзыдэнт СССР Міхаіл Гарбачоў запатрабаваў ад Вярхоўнага Савету Літвы адмены акту аб незалежнасьці і аднаўленьня савецкай Канстытуцыі. Гэтае патрабаваньне было падмацавана вайсковай сілай, што скончылася штурмам віленскага тэлецэнтру і ахвярамі сярод цывільных асобаў. Пазьней літоўскі суд асудзіў шэраг вінаватых у гэтай справе, некаторыя дагэтуль у міжнародным вышуку. Генэрала Ўладзімера Ўсхопчыка, які камандаваў віленскім гарнізонам, а пазьней быў намесьнікам міністра абароны Беларусі, Менск адмовіўся выдаць Літве.
2023 — Радыё Свабода адкрыла новы офіс у Вільні.
У гэты дзень нарадзіліся
1892 — Мэльхіёр Ваньковіч, польскі пісьменьнік, родам зь Беларусі. Дзяцінства правёў у Менску, шмат падарожнічаў па Беларусі, сябраваў зь беларускімі літаратарамі ды шмат рабіў дзеля пашырэньня беларускае літаратуры ў Польшчы. Пра сваё менскае дзяцінства Ваньковіч напісаў кнігу «Шчанячыя гады», што выйшла ў канцы 30-х гадоў.
1896 — Георгі Лаўроў, архітэктар знакавых будынкаў у Беларусі.
1905 — Тацяна Бірыч, беларускі афтальмоляг, доктар мэдычных навук.
1930 — Фёдар Капуцкі, хімік, рэктар БДУ ў 1990–1996 гадах.
1934 — Леанід Краўчук, першы прэзыдэнт Украіны.
1966 — Яраслаў Раманчук, беларускі палітык і эканаміст.
У памяці
1684 — Крыштаф Жыгімонт Пац, вялікі канцлер літоўскі.
1778 — Карл Лінэй, швэдзкі прыродазнавец, стваральнік адзінай сыстэмы расьліннага і жывёльнага сьвету.
1906 — Цэлястын Цеханоўскі, лекар, паплечнік Каліноўскага (памёр на катарзе).
2004 — Алесь Усюкевіч, сакратар падпольнага Саюзу вызваленьня Беларусі, які дзейнічаў у Наваградку ў 1946–1947 гг. Памёр у ссылцы.
