Адпаведны зварот кіраўнік Мінпрыроды Андрэй Худык анансаваў на паседжаньні згаданай рады 8 верасьня, тэкст быў апублікаваны праз пяць дзён.
У дакумэнце гаворыцца, што «будаўніцтва агароджы падзяліла Белавескую пушчу на дзьве часткі, прычыніўшы тым самым непапраўныя страты дзікім жывёлам і расьлінам, якія жывуць у ёй, яе першабытнаму рэліктаваму лесу».
Экалягічная рада пры Мінпрыроды заклікала польскіх грамадзян «аддаць свае галасы за ачышчэньне лёгкіх Эўропы ад бэтоннага іншароднага цела (агароджа зробленая з мэталу. – BPN) і тым самым паклапаціцца пра будучыню і не адчуць пасьля сораму перад сваімі нашчадкамі».
Рэфэрэндум у Польшчы пройдзе разам з парлямэнцкімі выбарамі. Адно з вынесеных на яго пытаньняў гучыць наступным чынам: «Ці падтрымліваеце вы скасаваньне бар'еру на мяжы Рэспублікі Польшчы з Рэспублікай Беларусь?»
Польшча ўзводзіла 206-кілямэтровую загароду ўздоўж мяжы зь Беларусьсю са студзеня 2022 году па чэрвень 2023-га. Будаўніцтва фізычнага барʼеру стала рэакцыяй Варшавы на патокі зь вясны 2021 году нерэгулярных мігрантаў, якія імкнуцца трапіць у краіны ЭЗ зь беларускай тэрыторыі.
За мінулыя суткі польскія памежнікі не дазволілі нелегальна трапіць 35 мігрантам з боку Беларусі, ад пачатку верасьня — 449, году — 20 766.
