Першы Кангрэс беларускай культуры на эміграцыі пройдзе 16–17 верасьня ў Варшаўскім цэнтры крэатыўнасьці. Паводле інфармацыі арганізатараў, місія кангрэсу палягае ў «дасьледаваньні актуальнай сытуацыі ў сфэры беларускай культуры, стварэньні ўмоў для яе разьвіцьця і захаваньня культурнай спадчыны». Ён таксама накіраваны на «вырашэньне праблем, зь якімі сутыкаюцца беларускія дзеячы культуры і мастацтва».
«Мы ставім задачу распрацаваць стратэгію рэалізацыі мастацкіх праектаў, падняць статус культурных прафэсіяналаў і пабудаваць масты, якія зьвязваюць беларускіх мастакоў і культурныя арганізацыі паміж сабой і з эўрапейскімі калегамі», — гаворыцца ў паведамленьні.
Чакаецца, што ў форуме возьмуць удзел каля 250 дзеячаў культуры, у тым ліку пісьменьнік і перакладчык Альгерд Бахарэвіч, старшыня Беларускага ПЭН-цэнтру паэтка Тацяна Нядбай, выдавец і гісторык Андрэй Янушкевіч, мастак Андрэй Дурэйка, арт-мэнэджарка Ганна Чыстасердава, дырэктар Бэрлінскай галерэі сучаснага мастацтва Galerie Лена Прэнц і інш.
