Банкі павінны быць часткай праекту ўкраінскіх уладаў па забесьпячэньні непарушнасьці і бесьперапыннасьці функцыянаваньня найважнейшых сэрвісаў ва ўмовах энэргетычнага тэрору, а менавіта бесьперапыннасьці аказаньня банкаўскіх паслуг. З ініцыятывы Нацыянальнага банку Ўкраіны ўсе сыстэмна значныя банкі аб’ядналіся для стварэньня адзінай банкаўскай сеткі — Power banking, піша сайт Нацбанку.
Гэта аб’яднаная сетка аддзяленьняў банкаў па ўсёй Украіне, якая будзе працаваць і абслугоўваць кліентаў нават у крытычнай сытуацыі падчас адключэньня электраэнэргіі, якое нярэдка наступае ва Ўкраіне пасьля расейскіх абстрэлаў.
Філіялы аб’яднанай сеткі аснашчаны альтэрнатыўнымі крыніцамі энэргіі і рэзэрвовымі каналамі сувязі, маюць узмоцнены інкасацыйны і дадатковы пэрсанал.
«Гэта выклік для ўсёй краіны, для кожнага з нас. Па даручэньні прэзыдэнта ўрад і мясцовыя адміністрацыі рэалізуюць праект па стварэньні сеткі „пунктаў нязломнасьці“. Са свайго боку банкі абараняюць фінансавы фронт, і іх задача — забясьпечыць бесьперапыннасьць аказаньня банкаўскіх паслуг. Аб’яднаная банкаўская сетка — унікальны праект і прыклад кансалідацыі і партнэрства ўкраінскіх банкаў. Бо дамовіліся выбраць не канкурэнцыю, а штодзённую каардынацыю і абмен вопытам, каб разам эфэктыўна супрацьстаяць выклікам вайны», — падкрэсьліў старшыня праўленьня Нацбанку Андрэй Пышны.
Сёньня сетка аб’ядноўвае ўжо ўсе 14 сыстэмна значных банкаў, філіялы якіх сталі асновай гэтай сеткі, а таксама прыцягвае іншых удзельнікаў банкаўскага рынку. Зараз для працы ў пэрыяд адключэньня электраэнэргіі дадаткова абсталяваныя больш за 1000 аддзяленьняў ва ўсіх рэгіёнах краіны. Ва ўмовах адключэньня ўсім кліентам у аддзяленьнях Power banking будзе даступны пэўны пералік тэрміновых банкаўскіх паслуг, а менавіта:
- прыём наяўных (у банкаматах або ў касе);
- плацяжы, грашовыя пераводы (у касах або тэрміналах самаабслугоўваньня);
- абмен валюты (пры наяўнасьці гатоўкі ў касе);
- кансультаваньне мэнэджараў у фінансавых пытаньнях.
Акрамя таго, у аддзяленьнях сеткі Power banking увялі нацыянальны роўмінг банкаматаў. Мэта — даць украінцам магчымасьць зьняць у банкамаце любога сеткавага банку павышаную суму наяўных грошай, дастатковую для задавальненьня бягучых патрэб і стварэньня пэўнай рэзэрвы. Мапа аддзяленьняў сеткі рэгулярна абнаўляецца на асобным сайце Нацыянальнага банку, дзе можна знайсьці больш падрабязную інфармацыю пра сетку, сьпіс яе аддзяленьняў, роўмінг банкаматаў, парады і адказы на часта задаваныя пытаньні.
Пасьля абстрэлаў расейцамі цывільнай энэргетычнай інфраструктуры Ўкраіны ў дзяржаве пачаліся перабоі з ацяпленьнем, вадой, электраэнэргіяй. Гэта змусіла ўкраінскія ўлады пачаць закупляць аўтаномныя генэратары і абсталёўваць у гарадах «пункты нязломнасьці», дзе кожны грамадзянін можа падсілкаваць тэлефон і ноўтбук, паесьці ды пагрэцца.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
