2,5 і 3 гады зьняволеньня за акцыю пратэсту
Як паведамляе «Вясна», суд Салігорскага раёну вынес прысуды групе ўдзельнікаў леташняй акцыі пратэсту, якіх абвінавацілі паводле двух артыкулаў Крымінальнага кодэксу: ч. 1 арт. 342 (арганізацыя і падрыхтоўка дзеяньняў, якія груба парушаюць грамадзкі парадак, альбо актыўны ўдзел у іх) і ч. 2 арт 363. (супраціўленьне супрацоўніку органаў унутраных справаў або іншай асобе, якая ахоўвае грамадзкі парадак). На лаве падсудных былі чацьвёра: Павал Крашакоў, Ігнат Ігнаценя, Кірыл Рамашка і Даніла Басяк.
Справу разглядаў судзьдзя Юры Блоцкі. Судовы працэс распачаўся 7 сьнежня. Да суду ўсе чацьвёра знаходзіліся пад вартай.
- У выніку Паўлу Крашакову, Кірылу Рамашку, Данілу Басяку прысудзілі два з паловай гады пазбаўленьня волі ў папраўчай калёніі агульнага рэжыму і 2000 рублёў кампэнсацыі пацярпелым супрацоўнікам міліцыі;
- Вырак Ігнату Ігнаценю — тры гады пазбаўленьня волі ў папраўчай калёніі агульнага рэжыму і 2000 рублёў кампэнсацыі.
Студэнта БДУІР Ніканава пакаралі 3 гадамі «хіміі»
У Ленінскім судзе Менску вынесьлі прысуд у крымінальнай справе студэнта БДУІР, палітвязьня Івана Ніканава, якога абвінавачвалі ў «арганізацыі і падрыхтоўцы дзеяньняў, што груба парушаюць грамадзкі парадак, альбо актыўным удзеле у іх» (ч. 1 артыкулу 342 КК РБ).
Іван — студэнт БДУІР, якога затрымалі 12 кастрычніка 2021 году за ўдзел у акцыі пратэсту 25 кастрычніка 2020 году. Хлопца вызвалілі ў залі суду да прызначэньня яму ўмоваў адбыцьця пакараньня.
Патэлефанавала ў міліцыю і аблаяла Лукашэнку — атрымала 2 гады «хіміі»
Суд Баранавічаў і Баранавіцкага раёну разгледзеў крымінальную справу 54-гадовай Алы Ціхаміравай, якую абвінавачвалі паводле ч. 1 арт. 368 – «Абраза прэзыдэнта Рэспублікі Беларусь». Згодна з абвінавачаньнем, 17 кастрычніка жанчына пазваніла з хатняга тэлефона ў «102» і нецэнзурна аблаяла Лукашэнку, паведамляе «Вясна».
Паводле зьвестак сьледзтва, гэткія ўчынкі Ціхамірава рабіла неаднойчы — толькі сёлета яна больш за сто разоў без патрэбы тэлефанавала ў міліцыю, чым «ускладняла працу праваахоўнікаў і замінала іншым грамадзянам да іх зьвяртацца». У выніку судзьдзя Іна Паўлоўская прысудзіла жанчыне два гады «хіміі».
Тры гады калёніі за жалобныя кошыкі ля дзьвярэй міліцыянта і судзьдзі
40-гадовы жыхар Стаўпецкага раёну атрымаў тры гады калёніі за тое, што паставіў ля дамоў міліцыянта і судзьдзі рытуальныя жалобныя кошыкі, у якіх пакінуў цыдулкі з пагрозамі, паведамляе reform.by са спасылкай на Генэральную пракуратуру.
Суд абавязаў мужчыну таксама выплаціць паўтары тысячы рублёў як кампэнсацыю маральнай шкоды пацярпеламу міліцыянту.
Пэнсіянэрцы запісалі парушэньне, бо пераблытала час адзначэньня ў міліцыі
Хворая на анкалёгію пэнсіянэрка Людміла Хлусевіч, якая нядаўна пачала адбываць паўтара года «хатняй хіміі», мае першае «парушэньне рэжыму», піша «Вясна».
Жанчына 19 сьнежня пераблытала час, калі ёй трэба адзначацца ў міліцыі, і пайшла туды на паўтары гадзіны раней. У гэты момант да яе прыйшлі супрацоўнікі Дэпартамэнту выкананьня пакараньняў і не засьпелі ў кватэры.
Гэтае парушэньне будзе разглядаць суд, які можа пакараць пэнсіянэрку 15 днямі арышту ці штрафам.
На мяжы затрымалі беларуса
Праваабаронцы паведамілі, што ноччу 21 сьнежня на беларуска-літоўскай мяжы затрымалі жыхара Іўя Анатоля Міцкевіча. Прычына пакуль невядомая.
Абласны суд у Горадні зьліквідаваў аб’яднаньне маладых навукоўцаў «ВІТ»
Пра гэта паведаміў «Белсат».
Абʼяднаньне праіснавала 26 гадоў. Яго заснавалі ў 1995 годзе маладыя гісторыкі, правазнаўцы, філёлягі. Яны імкнуліся зьмяніць да лепшага сыстэму адукацыі і рыхтаваньня навуковых кадраў, настаўнікаў.
«ВІТ» рэалізоўвала свае праекты ў тым ліку супольна зь дзяржавай —канфэрэнцыі і публікацыі на тэму канстытуцыйнага права Беларусі, гісторыі ВКЛ і беларускага нацыянальнага руху, унармаваньня беларускай мовы. Шмат праектаў тычыліся працы з настаўнікамі ў рэгіёнах.
Старшыня арганізацыі падаў апэляцыю на гэтае рашэньне.
