Жыхарка Менску Браніслава ўвечары 15 ліпеня вырашыла зьезьдзіць у цэнтар гораду. Да патрэбнай ёй «Кастрычніцкай» жанчына не дабралася, бо цягнік не спыняўся на цэнтральных станцыях паводле рэкамэндацыі міліцыі. Вярнулі ёй ня грошы, а таварны чэк, піша Tut.by.
«На ўваходзе ў мэтро мне ніхто нічога не сказаў. Толькі калі цягнік падыходзіў да станцыі, абвясьцілі, што мэтро не спыняецца на станцыях „Кастрычніцкая“, „Купалаўская“, „Плошча Перамогі“, — кажа Браніслава.
Жанчына стала абурацца, яе падтрымалі і іншыя.
«А што гэта ў нас — ваеннае становішча, што мэтро не спыняецца?» — пыталіся пасажыры.
На станцыі «Няміга» пасажыры зьвярнуліся ў касу, каб вярнуць кошт праезду. Спачатку ім адмовілі, казалі, што трэба праверыць па камэрах назіраньня, уваходзілі жанчыны ў мэтро.
Урэшце рэшт таварныя чэкі на 70 капеек выпісалі тром пасажырам.
Яна не хавае, што ехала ў тым ліку падтрымаць народ, калі ў Цэнтральную выбарчую камісію стаяла вялікая чарга з ахвочых падаць скаргу на адмову ў рэгістрацыі двух прэтэндэнтаў на прэзыдэнцкую пасаду.
Як сотні людзей прыйшлі падаць скаргі на нерэгістрацыю кандыдатаў у ЦВК. Фотарэпартаж
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
