Аляксандар Лукашэнка разам з са сваімі сынамі Мікалаем, Віктарам і Дзьмітрыем 3 ліпеня паўдзельнічаў у цырымоніі ўскладаньня кветак на плошчы Перамогі ў Менску.
«У гады Вялікай Айчыннай вайны беларускі народ зрабіў гістарычны выбар — паставіў сваю свабоду вышэй за сваё жыцьцё. Іншага выбару і не магло быць у нашчадкаў старажытнага славянскага народа — моцнага, ганарлівага і незалежнага. Народа, які сам ніколі ня быў рабом», — сказаў Аляксандар Лукашэнка ў вітальным слове.
«Мы разам будуем нашу незалежную дзяржаву, — сказаў Аляксандар Лукашэнка. — Наша будучыня залежыць толькі ад нас саміх. Ніхто ня ў стане расхістаць нашу стабільнасьць і незалежнасьць, якая сёньня ў Беларусі. Толькі мы можам вяршыць лёс свайго народа на гэтай зямлі».
Афіцыйнае сьвяткаваньне Дня незалежнасьці пачалося а 10-й гадзіне ў Менску з патрыятычнага шэсьця «Беларусь памятае».
Сярод іншых урачыстых імпрэзаў 3 ліпеня ў Менску — адкрыцьцё музычнага фантана на Сьвіслачы, канцэрт каля стэлы «Менск — горад-герой» і сьвяточны салют.
