У Telegram-канале прэс-сакратаркі Міністэрства ўнутраных справаў Беларусі днём 24 чэрвеня апублікавалі аўдыёзапісы тэлефонных размоваў, у якіх некалькі людзей скардзяцца на бойкі, якія нібыта адбыліся каля менскай крамы Symbal.by, дзе 23 чэрвеня затрымлівалі людзей з чаргі.
МУС паведамляе пра здарэньне каля «ООО „Символ Бэй“». З кантэксту зразумела, што ідзецца пра краму Symbal.by, правільная юрыдычная назва кампаніі — ТАА «Сымбаль Бай». Прэс-служба МУС заяўляе, што зьвесткі пра масавыя затрыманьні людзей з чаргі пад крамай «скажоныя»:
«Для разгляду на пазначаны адрас выбылі супрацоўнікі міліцыі. У выніку ўдзельнікаў канфлікту даставілі для разбору ў Савецкае РУУС Менску, супрацоўнікі якога праводзяць праверку фактаў бойкі і пашкоджаньня аўтамабіля. Цяпер высьвятляюцца прычыны здарэньня, у сувязі з чым распачаты адміністрацыйны працэс у дачыненьні да яшчэ некалькіх чалавек».
Перад затрыманьнямі здарыўся інцыдэнт: нібыта мясцовы жыхар на машыне меркавана зачапіў аднаго зь людзей у чарзе, калі выяжджаў з двара, пачалася тузаніна. Пацярпелы выклікаў міліцыю. Аднак, як вядома з пратаколаў, затрымлівалі людзей не за бойку, а за «масавае мерапрыемства» і «непадпарадкаваньне міліцыі».
Белавус: «Што кажа міністэрства, гэта нейкая хлусьня»
Здарэньне бачнае ад 10:40 на відэастрыме Symbal.by.
Дырэктар крамы Symbal.by Павал Белавус сказаў Свабодзе, што пасьля таго здарэньня затрымалі і кіроўцу. Але прынамсі ад двух чалавек прыйшлі пратаколы, у якіх бачна, што затрымлівалі не за бойку, а за тое, што нібыта крычалі «Стоп таракан» і «Сыходзь» — аднак на стрыме бачна, што такога каля крамы не адбывалася.
«Тое, што кажа міністэрства, гэта нейкая хлусьня, таму што пратаколы складзеныя па зусім іншай гісторыі», — дадае Белавус.
Міліцыя пытала, чаму працуюць так павольна
Апоўдні 24 чэрвеня каля крамы зноў утварылася чарга. Паводле супрацоўнікаў крамы, кажа Белавус, прыехалі супрацоўнікі міліцыі і пачалі пытацца, чаму пакупнікоў так павольна абслугоўваюць, што ўтвараецца чарга.
Пасьля затрыманьняў ля крамы Symbal.by зноў чарга пакупнікоў. Фотагалерэя
«Мы патлумачылі: па-першае, мы тыдзень без электрычнасьці сядзім, у нас фізычна няма магчымасьці паставіць дадатковую касу ў дадзенай сытуацыі, — кажа Белавус. — Мы патлумачылі сытуацыю, паздымалі там і сышлі».
Пасьля гэтага чаргу не разганялі, людзі засталіся каля крамы. Пакуль, кажа дырэктар крамы, пляны ранейшыя: працаваць да 29 чэрвеня.
Тым часам краме ўжо паведамілі, што на наступны дзень прыедуць супрацоўнікі «Менскрэклямы» і будуць здымаць шыльду, якая нібыта вісіць незаконна — хоць тая шыльда вісела тры гады, за яе штогод плацілі.
* * *
Чарга пад крамай утварылася пасьля таго, як бізнэсовец Павал Белавус абвясьціў пра закрыцьцё офлайн-крамы Symbal.by з 29 чэрвеня. Раней прыпыніла працу онлайн-крама. Паводле Белавуса, праверкі крамы не спыняюцца, а толькі нарастаюць.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
