Дакладнай даты пакуль не называюць.
Кабінэт міністраў Украіны ўхваліў рашэньне аднавіць памежны рух у пунктах пропуску на дзяржаўнай мяжы зь Беларусьсю і Расеяй.
«Праект рашэньня распрацаваны з мэтай аднавіць рух у пунктах пропуску на дзяржаўнай мяжы з Расеяй і Беларусьсю ў сувязі з паступовым аслабленьнем карантынных захадаў ва Ўкраіне», — паведаміў міністар унутраных спраў Украіны Арсэн Авакаў.
У прыватнасьці, плянуецца аднавіць пешаходны рух для грамадзян Украіны і рух аўтамабільнага транспарту ў двух пунктах пропуску:
- «Дольск» (Валынская вобласьць) — «Махро» (Берасьцейская вобласьць, Янаўскі раён) і
- «Вільча» (Кіеўская вобласьць) — «Аляксандраўка» (Гомельская вобласьць, Нараўлянскі раён).
Усяго ж на беларуска-ўкраінскай мяжы 12 пунктаў пропуску.
У той жа час міністар не назваў дакладнага тэрміну, калі адновіцца памежны рух, і колькасьці пунктаў пропуску, на якіх будзе адноўлена дзейнасьць, у тым ліку і для грамадзян Беларусі. Гэта стане вядома толькі пасьля таго, як апублікуюць адпаведнае рашэньне ўраду. Цяпер яно дапрацоўваецца з улікам прапаноў Дзяржаўнай памежнай службы Ўкраіны.
У канцы траўня Ўкраіна аднавіла паўнавартасны рух на межах з Польшчай, Вугоршчынай, Славаччынай, Румыніяй і Малдовай і пакінула закрытымі пункты пропуску на межах з Расейскай Фэдэрацыяй і Беларусьсю.
Мяжу зь Беларусьсю ў сувязі з пашырэньнем каранавірусу Ўкраіна цалкам закрыла ў ноч на 16 сакавіка — на 7 міжнародных пунктах пропуску быў спынены аўтамабільны і пешаходны рух.
Праз гэтыя пункты на тэрыторыю Ўкраіны маглі трапіць толькі ўкраінскія грамадзяне, а таксама іншаземцы і грамадзяне Беларусі, якія маюць ва Ўкраіне від на часовае або сталае жыхарства, зьяўляюцца сужэнцамі або бацькамі грамадзян Украіны.
Ва Ўкраіну таксама прапускалі акрэдытаваных супрацоўнікаў дыпляматычных і консульскіх устаноў, прадстаўнікоў міжнародных арганізацый і іхныя сем’і. Усе астатнія маглі трапіць на ўкраінскую тэрыторыю толькі па ўзгадненьні зь Міністэрствам замежных спраў Украіны.
