Сьледчыя Дзяржаўнага бюро расьсьледаваньняў паводле даручэньня генэральнага пракурора Ўкраіны Ірыны Венядзіктавай абвясьцілі падазрэньне пятаму прэзыдэнту Ўкраіны Пятру Парашэнку. Цяпер вырашаецца пытаньне аб абраньні для яго меры папярэдняга стрыманьня і зьмяшчэньні пад варту.
«Гэтае падазрэньне будзе адпраўлена яшчэ і поштай. Сёньня або заўтра ў суд будзе накіравана хадайніцтва аб абраньні меры папярэдняга стрыманьня. Мы зробім гэта хутка, але патрэбны яшчэ допыт Пятра Парашэнкі ў якасьці падазраванага», — паведаміла журналістам Ірына Венядзіктава.
Сьледчыя падазраюць, што ў 2018 годзе, у часе свайго прэзыдэнцтва, Пятро Парашэнка аддаў «злачынны загад» кіраўніку Службы зьнешняй выведкі Ўкраіны аб прызначэньні ягоным намесьнікам Сяргея Семачкі, сям’я якога атрымала грамадзянства Расеі і вяла бізнэс у анэксаваным Крыме.
Гэтыя дзеяньні Пятра Парашэнкі сьледзтва кваліфікуе як наўмыснае перавышэньне ўладных правоў і паўнамоцтваў у асаблівы пэрыяд. Паводле Крымінальнага кодэксу Ўкраіны такія дзеяньні караюцца пазбаўленьнем волі на тэрмін ад 7 да 10 гадоў.
Пятро Парашэнка і ягоныя адвакаты лічаць, што падазрэньне яму ня ўручанае, бо парушаная працэдура — яны пераконваюць, што гэты дакумэнт мусіла ўручаць генэральны пракурор Ірына Венядзіктава, бо экс-прэзыдэнт — народны дэпутат Украіны.
«Сёньняшнія дзеяньні генэральнага пракурора сьведчаць, што гэта дакладнае ўказаньне ад прэзыдэнта. Мы перакананыя, што тут ёсьць склад злачынства — умяшаньне ў дзейнасьць генэральнага пракурора», — заявіў Пятро Парашэнка.
Ён перакананы, што дзеяньні генэральнага пракурора і Дзяржаўнага бюро расьсьледаваньняў — гэта палітычны перасьлед апазыцыі: «Мы вяртаемся ў часы Януковіча».
Супраць Пятра Парашэнкі пасьля сыходу з прэзыдэнцкай пасады было заведзена больш як 20 спраў — у тым ліку аб дзяржаўнай здрадзе і злоўжываньні ўладай. Сярод абвінавачаньняў — арганізацыя праходу караблёў праз Керчанскую затоку, ухіленьне ад падаткаў, умяшаньне ў працу судоў, незаконнае прызначэньне Ўладзімера Гройсмана прэм’ер-міністрам, незаконнае завалоданьне зямельным участкам і маёмасьцю ды іншыя. Парашэнка адмаўляе ўдзел у любых супрацьзаконных дзеяньнях.
Паводле Канстытуцыі Ўкраіны прэзыдэнт карыстаецца правам недатыкальнасьці толькі на час выкананьня паўнамоцтваў. Званьне ж прэзыдэнта Ўкраіны захоўваецца за ім пажыцьцёва, калі толькі ён ня быў адхілены ад пасады ў парадку імпічмэнту.
