Украінскія вайскоўцы возьмуць удзел у «Маршы роўнасьці» ў Кіеве ў нядзелю.
Пра гэта ў сваім фэйсбуку напісаў былы служачы дабравольніцкага батальёна «Данбас» Віктар Піліпенка.
Паводле яго слоў, у калёне вайскоўцаў пройдуць як мінімум 15 чалавек, цытуе яго ўкраінскі Цэнтар інфармацыі аб правах чалавека. Але ён разьлічвае, што на яго заклік адгукнуцца больш удзельнікаў.
«Марш праходзіць за нашы і вашы правы — за краіну, дзе працуе незалежны суд, дзе праваахоўныя органы абараняюць Права, дзе ёсьць Роўнасьць для ўсіх, а зь ім — роўныя магчымасьці», — напісаў Піліпенка.
Па словах былога вайскоўца, ідэя асобнай калёны для ЛГБТ-вайскоўцаў зьявілася ў яго пасьля публічнага камінг-аўту, які ён зрабіў у мінулым годзе.
З 16 чэрвеня ў Кіеве праходзіць сэрыя мерапрыемстваў пра раўнапраўе і інклюзыўнасьць пад эгідай арганізацыі «КиевПрайд», у нядзелю акцыі завершацца гей-парадам «Марш роўнасьці» ў цэнтры горада. Арганізатары разьлічваюць, што ў ім возьмуць удзел ня менш за 10 тысяч чалавек, і запрасілі на мерапрыемства прэзыдэнта Украіны Уладзіміра Зяленскага, паведамляе "Голас Амэрыкі".
