Дэпутаты ў першым чытаньні прынялі законапраект «Аб становішчы замежных грамадзян і асобаў без грамадзянства». Іншаземцы змогуць знаходзіцца ў краіне без рэгістрацыі да 10 дзён (цяпер да 5 дзён).
Тэрмін без рэгістрацыі павялічыцца ўдвая
У Беларусі будуць уведзеныя новыя правілы для іншаземцаў, якія хацелі б стала пражываць на тэрыторыі краіны. Калі цяпер для заяўкі на сталае жыхарства неабходна ня меней за 7 апошніх гадоў безь перапынку знаходзіцца ў Беларусі, то ў папраўках да закону «Аб прававым стане замежных грамадзян і асобаў без грамадзянства ў Рэспубліцы Беларусь» прапануецца скараціць гэты тэрмін да 4 гадоў.
Паводле намесьніка міністра ўнутраных спраў Мікалая Мельчанкі, які прадстаўляў законапраект, такія захады дазволяць прыцягнуць у Беларусь адмыслоўцаў высокай кваліфікацыі.
Дакумэнт таксама прадугледжвае і пашырэньне сьпісу падставаў наведваньня Беларусі для іншаземцаў, якія прыяжджаюць сюды на вучобу. Мяркуецца, што гэта паспрыяе павелічэньню колькасьці студэнтаў з-за мяжы.
Таксама зь 5 да 10 сутак павялічваецца тэрмін знаходжаньня ў Беларусі іншаземцаў без рэгістрацыі. Як лічыць Мікалай Мельчанка, гэта стане яшчэ адным сродкам для заахвочваньня наведваньня Беларусі замежнымі турыстамі.
Паводле намесьніка кіраўніка МУС, летась у Беларусь прыехалі 5 мільёнаў іншаземцаў, сярод іх 100 тысяч скарысталіся бязьвізавым уездам.
Захады для заахвочваньня іншаземцаў
Каб Беларусь была больш прывабнай для турыстаў, плянуецца ўнесьці змены ў законапраект «Аб прававым становішчы замежных грамадзян і асобаў без грамадзянства ў РБ»:
• іншаземцам дазволяць знаходзіцца ў Беларусі без рэгістрацыі на працягу 10 дзён (цяпер яны павінны зарэгістравацца, калі прыяжджаюць на тэрмін, большы за 5 дзён);
• высокакваліфікаваным работнікам з-за мяжы дазвол на часовае пражываньне можа быць выдадзены на тэрмін да двух гадоў;
• дазвол на сталае пражываньне такім работнікам можа быць выдадзены праз 4 гады, а не праз 7, як цяпер.
Што важна ведаць пра беларускі «бязьвіз»
Бязьвізавы ўезд у Беларусь дзейнічае зь лютага 2017 году:
- пры ўезьдзе праз Нацыянальны аэрапорт «Менск»;
- для наведнікаў бязьвізавай зоны «Берасьце – Горадня».
Колькі дзён можна знаходзіцца ў Беларусі бязь візы?
- Да 30 дзён пры ўмове прылёту ў Нацыянальны аэрапорт «Менск» і вылету адтуль жа;
- Да 15 дзён для турыстаў бязьвізавай зоны «Берасьце — Горадня».
«Бязьвізам» нельга скарыстацца, прыляцеўшы з Расеі, бо на гэтых рэйсах няма памежнага кантролю.
Замежнікам, якія зьбіраюцца гасьцяваць у Беларусі больш за 10 працоўных дзён, трэба рэгістравацца ў органе рэгістрацыі (МЗС, або органе ўнутраных спраў) па месцы пражываньня. У гатэлях і санаторыях рэгістрацыю праводзіць адміністрацыя падчас засяленьня, са студзеня 2019 году можна таксама бясплатна зарэгістравацца праз інтэрнэт.
