Расейскія апазыцыйны палітыкі Ільля Яшын і Уладзімір Мілоў у сераду прадставілі даклад «Пуцін. Вынікі. 2018», прысьвечаны эканамічным, сацыяльным і геапалітычным вынікам праўленьня Уладзіміра Пуціна.
Аўтары дакладу заяўляюць, што за апошнія 18 гадоў Расея апынулася ў стане глыбокага крызысу, а эканамічны рост фактычна спыніўся. Урад скарачае выдаткі на сацыяльную сфэру, у той час як набліжаныя прэзыдэнта атрымліваюць мільярды, адзначыў Ільля Яшын.
Апазыцыянэры вінавацяць прэзыдэнта Расеі ў стварэньні «карумпаванай дзяржавы», а таксама правядзеньні палітыкі, праз якую Расея апынулася ў міжнароднай ізаляцыі.
Паводле Яшына і Мілова, даклад «Пуцін. Вынікі. 2018» працягвае традыцыю, распачатую ў свой час Барысам Нямцовым. Выступленьне яны прысьвяцілі яго памяці.
Уладзімір Мілоў адзначыў, што ніводная друкарня не згаджалася друкаваць даклад. Кіраўнікі прадпрыемстваў заяўлялі, што асьцерагаюцца закрыцьця з прычыны крытыкі кіраўніка дзяржавы, якая зьмяшчаецца ў тэксьце.
У мінулую нядзелю стала вядома, што паліцыя канфіскавала надрукаваны наклад дакладу, а ў друкарні прайшоў ператрус.
