Генпракуратура Беларусі паведаміла, што ліст палітыкаў Анатоля Лябедзькі, Уладзімера Някляева і Мікалая Статкевіча пра незаконнае праслухоўваньне накіраваны ў Міністэрства ўнутраных спраў.
Пра гэта карэспандэнту Свабоды паведаміў Уладзімер Някляеў.
«Звычайная адпіска. Пішуць, што яны накіравалі наш зварот у Міністэрства ўнутраных спраў для далейшай праверкі. Хаця мы пыталіся ў іх пра адно: вы давалі санкцыі на праслухоўваньне ці не? Дык пра гэта ні слова. Па сутнасьці, яны даручылі правяраць тым, хто гэтыя „жучкі“ ставіў, то бок хутчэй за ўсё ставіла „гэбуха“, але ў прынцыпе кантора сумежная. Але крок наперад — гэта першы ліст генпракуратуры, які я атрымаў на беларускай мове».
Ці зрабілі высновы апазыцыйныя палітыкі з гэтай гісторыі з праслухоўваньнем ў кафэ «Салодкі фальварак», ці прынялі яны пэўныя захады бясьпекі?
«Я наагул ніколі не хаваўся і не правяраў, ці стаяць гэтыя „жучкі“. Бо я не лічу, што займаюся антыдзяржаўнай ці нейкай шпіёнскай справай, якую трэба адсочваць, правяраць, а мне ад некага хаваць. Мне няма чаго хавацца. Але там жа народу процьма і кожнаму трэба прыдумаць нейкую гульню, вось яны і прыдумляюць».
Анатоль Лябедзька сьцьвярджае, што 16 кастрычніка падчас сустрэчы зь Някляевым у кавярні «Салодкі фальварак» на плошчы Перамогі выявіў у сурвэтніцы «жучок» для праслухоўваньня і запісу размовы.
