Сёньня Вярхоўны суд Расеі зьмякчыў пакараньне былым кіраўнікам нафтавага канцэрну «Юкас» Міхаілу Хадаркоўскаму і Платону Лебедзеву з 11 гадоў да 10 гадоў і 10 месяцаў.
Такім чынам, суд часткова задаволіў скаргу абароны былых саўладальнікаў «Юкаса» на прысуд у другой крымінальнай справе.
Цяпер Лебедзеў можа выйсьці на волю ў траўні, а Хадаркоўскі ў жніўні 2014 году.
У пачатку пасяджэньня пракуратура папрасіла вышэйшую судовую інстанцыю пакінуць фігурантам прызначаны судом 11-гадовы турэмны тэрмін бязь зьменаў.
Затым слова далі экс-кіраўніку «Юкаса» Міхаілу Хадаркоўскаму, які ўдзельнічаў ў пасяджэньні суду празь відэасувязь. Асуджаны бізнэсовец пачаў з крытыкі працы праваахоўных органаў, выказаўшы меркаваньне, што ад справы «Юкаса» ў Расеі пракуратура і Сьледчы камітэт сталі, разам з TV, «галоўнымі інструмэнтамі ўнутранай палітыкі». Вынік гэтай тэндэнцыі – «катастрафічны», «уся сыстэма права ў краіне паступова рассыпаецца», лічыць Хадаркоўскі.
«Менавіта ў гучных, палітычна матываваных працэсах, такіх, як гэты, – задаецца зьніжэньне стандартаў даказваньня, магчымасьць выбарачнага і абсурднага тлумачэньня заканадаўчых нормаў», – адзначыў асуджаны бізнэсовец.
Затым Міхаіл Хадаркоўскі перайшоў да пералічэньня супярэчнасьцяў у прысудзе. Паводле яго, ён знайшоў тры ўзаемавыключальныя вэрсіі, што ж ён «як бы скраў» – нафту, грашовыя сродкі або нафтапрадукты.
Са словаў экс-кіраўніка «Юкаса», калі першая справа выклікала сумневы адносна выбарачнага ўжываньня закона, другая справа іх разьвеяла і паказала, што гаворка «наогул ідзе не аб выкананьні закону, а пра гатоўнасьць ахвяраваць рэпутацыяй судовай сыстэмы дзеля новага турэмнага тэрміну апанэнтам улады».
«Няправедныя судовыя рашэньні ўжо сталі адным з галоўных дэтанатараў пратэстаў. Патрабаваньні ўсё большай часткі грамадзтва зводзяцца да простай формулы Аляксандра Салжаніцына: «Жыць без ілжы». Ці, словамі вуліцы: «Не хлусіць і не баяцца». Ня ведаю, як для бюракратыі, – для краіны гэта было б карысна», – рэзюмаваў ён. «Так я бачу і выкупленьне сваіх уласных грахоў: імкнуцца жыць без ілжы. І хай будзе, што будзе», – сказаў на заканчэньне Хадаркоўскі, папрасіўшы Вярхоўны Суд «гэты юрыдычна непісьменны прысуд адмяніць».
Былым кіраўнікам «Юкаса» канчаткова па двух прысудах прызначанае пакараньне ў выглядзе 11 гадоў пазбаўленьня волі – у Хадаркоўскага гэты тэрмiн лiчыцца з 25 кастрычніка 2003 (яму засталося адбыць год і 2,5 месяца), у Лебедзева – з 2 ліпеня 2003 году (яму засталося крыху менш за 11 месяцаў за кратамі).
Міхаіл Хадаркоўскі і Платон Лебедзеў былі арыштаваныя ў 2003 годзе. У траўні 2005 году іх прысудзілі да дзевяці гадоў пазбаўленьня волі па абвінавачваньні ў махлярстве і нявыплаце падаткаў. Пазьней Масгарсуд зьнізіў пакараньне да васьмі гадоў кожнаму.
Аб расьследаваньні другой крымінальнай справы ў дачыненьні да экс-кіраўнікоў «Юкаса» стала вядома адразу пасьля завяршэньня першага судовага працэсу. У сьнежні 2010 года ў рамках другой справы Хадаркоўскага і Лебедзева прысудзілі да 14 гадоў пазбаўленьня волі за крадзёж нафты і легалізацыю выручкі ад яе продажу. Праз паўгода Масгарсуд зьнізіў тэрмін пакараньня да 13 гадоў.
У чэрвені мінулага году абарона Хадаркоўскага і Лебедзева зьвярнулася да старшыні Вярхоўнага суду РФ Вячаслава Лебедзева з просьбай адмяніць прысуд у другой справе. Разгледзеўшы скаргу, старшыня ВС РФ прыняў рашэньне распачаць наглядную справу. Пастанова старшыні суду паступіла ў Масгарсуд у жніўні. У сьнежні прэзыдыюм гарадзкога суду прызнаў прысуд законным, але з улікам зьмяненьняў, унесеных у КК, зьнізіў тэрмін пакараньня фігурантам да 11 гадоў зьняволеньня кожнаму.
У лютым 2013 году абарона Лебедзева і Хадаркоўскага абскардзіла другі прысуд у Вярхоўным судзе РФ. Адвакаты папрасілі адмяніць прысуд першай інстанцыі і ўсе наступныя рашэньні судоў.
