Дзіяна Маісеенка выехала зь Беларусі летам 2023 году. Яна дачка былога палітвязьня Андрэя Іванюшына, якога асудзілі за інцыдэнт 19 верасьня 2020 году каля гандлёвага цэнтру «Эўропа» ў так званай «справе байкераў». Іванюшын тады атрымаў два з паловай гады пазбаўленьня волі. Ён цалкам адбыў тэрмін у шклоўскай калёніі.
Дзяўчына не хавае, што ў 2020-м удзельнічала ў пратэстах. У 2022-м, калі чакала вызваленьня бацькі, адчувала, што за ёй сочаць.
«Затрымалі майго мужа і далі 15 сутак, хоць ён ні на якія пратэсты не хадзіў. За мной сачылі маладзёны ў цывільным, у кепках. Летам 2022 году я вырашыла выехаць зь Беларусі, так і не дачакаўшыся таты з калёніі. У чэрвені ён выйшаў, але ў жніўні яго зноў затрымалі і пасадзілі на паўгода ў Жодзіна. Тату яшчэ раз асудзілі паводле 342-га артыкулу («Aрганізацыя масавых беспарадкаў і ўдзел у іх»). Цяпер ён на волі пад падпіскай аб нявыезьдзе», — расказала Дзіяна.
Больш за год яна жыве ў Грузіі. Пра тое, што і на яе завялі крымінальную справу, Дзіяна ня ведала. Са сваім сябрам раней езьдзіла ў Турэччыну. Гэтым разам вырашылі зьезьдзіць у вандроўку ў Армэнію, заадно і зрабіць так званы «візаран».
«Прыехалі на мяжу, памежнікі ўзялі пашпарт, запыталіся, ці мяняла я прозьвішча, якое прозьвішча ў мяне было раней (Маісеенка я па мужу). Адвялі ў адзін кабінэт, потым у другі — сказалі, што ня маюць права разгалошваць інфармацыю. Прыйшоў, як я зразумела, опэр і сказаў, што я ў вышуку. Павезьлі мяне ў мясцовую паліцыю. Там падпісалі пратакол і сказалі, што затрымліваюць да суду на 72 гадзіны. Натуральна, у мяне быў шок», — кажа Дзіяна.
Па словах суразмоўцы, абыходзіліся ў паліцэйскім пастарунку зь ёю цудоўна. Дзіяна прызнаецца, што спачатку быў страх, бо чула пра ўмовы на Акрэсьціна, наведвала бацьку ў Шклоўскай калёніі. А тут ёй прапаноўвалі каву, цікавіліся, ці не галодная яна, абыходзіліся надзвычай ветліва і далікатна.
«Я выйшла з пастарунку літаральна паўтары гадзіны таму і яшчэ ня ў курсе, што адбываецца. У аўторак паеду ў Ерэван да адваката. Майму абаронцу трэба працаваць, каб мне дазволілі выехаць з Армэніі. Бо пакуль выезд мне закрыты.
Па ідэі, экстрадаваць мяне ня могуць, але ў мяне ёсьць асьцярогі, што па мяне сілавікі могуць прыехаць зь Беларусі і забраць мяне. Ня ведаю, наколькі гэта рэальна. Таму я ўжо падала прашэньне аб палітычным прытулку ў Армэніі», — расказала Свабодзе Дзіяна Маісеенка.
Цяпер ад свайго адваката яна ведае, што ў дачыненьні да яе заведзена крымінальная справа па 342-м артыкуле. Копію справы ўжо мае армянскі адвакат.
«Я сваю справу яшчэ не адкрывала — там 150 старонак. Адвакат нібыта пачаў чытаць, але пакуль так і не зразумеў, за што мяне забралі. Нібыта я праходжу і ў справе таты — там фігуруе, што мы з татам былі ў змове і разам удзельнічалі ў пратэстах», — кажа Дзіяна Маісеенка.
Свабода будзе сачыць за разьвіцьцём падзей.
- Гэта ўжо ня першы выпадак затрыманьня беларусаў у Армэніі на запыт беларускіх уладаў. Сёлета ў лютым пры перасячэньні мяжы з Армэніяй затрымалі Максіма Вайткявічуса на падставе таго, што Беларусь абвясьціла яго ў вышук у справе аб ухіленьні ад службы. Спачатку яго затрымалі на 40 дзён, пасьля тэрмін быў працягнуты. У сакавіку ён падаў прашэньне аб прытулку. Абарона зьвяртала ўвагу, што ў Беларусі ён адбыў 15 дзён арышту, яго перасьледавалі за палітычныя погляды ў 2020 годзе. Праз час яму далі палітычны прытулак.
- Раней яшчэ адзін беларус, Яраслаў Новікаў, атрымаў прытулак у Армэніі. Яго таксама затрымлівалі на запыт беларускіх уладаў.
Форум