Найбольш тыражныя дзяржаўныя прапагандысцкія газэты падаражэлі на 4–7% за паўгода і на 14–18% за апошні год пры агульным росьце спажывецкіх цэнаў на 5,4% (ад лістапада 2023 году да лістапада 2022-га), сьведчыць праведзенае «Позіркам» параўнаньне цэнаў у падпісных каталёгах.
Цана паўгадавога камплекту «СБ. Беларусь сегодня» (былая «Советская Белоруссия») павялічылася на 5,3% (са 102,60 да 108 рублёў), «Народнай газеты» – на 6,4% (з 78,36 да 83,40), «Рэспублікі» – на 4,8% (з 94,32 да 98,82), «Сельской газеты» – на 4% (з 94,86 да 98,70), «Знамени юности» – на 6,8% (з 45,60 да 48,72), «7 дней» – на 6,4% (з 47,58 да 50,64), «Звязды» – на 5,4% (з 98,64 да 103,98 рубля).
Цана падпіскі на расейскія выданьні (сярод грамадзка-палітычных на рынак дапушчаныя толькі ляяльныя рэжыму Лукашэнкі) зьмянілася па-рознаму.
На ўкраінскія выданьні падпіска не праводзіцца ўжо два гады, на іншыя замежныя СМІ падпіскі ў Беларусі няма шмат гадоў.
Змаганьне ўлады супраць недзяржаўных СМІ
У 2020–2021 гадах перасталі выходзіць на паперы шэраг незалежных газэтаў нацыянальнага і рэгіянальнага абсягу. Большасьць газэтаў спынілі выхад праз палітычны ціск пасьля публікацый — ім не давалі далей друкавацца ў Беларусі. Перасьлед працягнуўся ў 2022-2023 гг.
Праблемы з друкарнямі паўсталі перад рэдакцыямі выданьняў:
- «Белгазета»,
- «Брестская газета»,
- «Газета Слонімская»,
- «Информ-прогулка»,
- «„Комсомольская правда“ в Белоруссии»,
- «Лидер-пресс».
- «Народная воля»,
- «Новы час»,
- «Рэгіянальная газета»,
- «Свободные новости плюс»,
- «Ганцавіцкі час».
У многіх рэдакцыях і ў журналістаў дома прайшлі ператрусы. Некаторыя рэдакцыі зазналі некалькі ператрусаў.
Фінансавыя праблемы сталі прычынай закрыцьця яшчэ дзьвюх папулярных у сваіх рэгіёнах незалежных газэтаў. На пачатку мінулага году перасталі выходзіць «Барысаўскія навіны», а ў канцы 2020 году выйшаў апошні нумар газэты «Вольнае Глыбокае».
Мэдыя і мэдыяарганізацыі, прызнаныя ўладай «экстрэмісцкімі фармаваньнямі/арганізацыямі»: Радыё Свабода, Белсат, БелаПАН, Эўрарадыё, Tut.by, Kyky.org, Наша Ніва, Хартыя’97, Флагшток, Hrodna.life, Volkovysk.by, Маланка Медыя, «Бабруйск Online», «Брестская газета», Беларуская асацыяцыя журналістаў, Мост, Люстэрка, Ранак, Беларускі расьсьледавальніцкі цэнтар, Tribuna.com Беларусь, Ex-press.livе, Deutsche Welle Беларусь, UDF.by.
У Воршы па рашэньні пракуратуры заблякавалі рэгіянальны партал Orsha.eu, у Гомлі «Свободные новости Плюс», у Віцебску «Витебский курьер».
Некаторыя рэдакцыі самі вырашылі спыніць выхад папяровых вэрсій, як, напрыклад, «Информ-прогулка» ў Лунінцы ці «ЎзГорак» у Горках.
