Як паведамляе турэцкі тэлеканал NTV, група людзей, якія выступаюць супраць дзеяньняў Ізраіля і ЗША, запатрабавалі закрыць авіябазу.
Па дадзеных тэлеканала, некаторыя ўдзельнікі акцыі прыехалі ў Адану са Стамбула, да іх далучыліся жыхары іншых гарадоў. Паліцыянты перакрылі вуліцы і праспэкты каля авіябазы. Калі дэманстранты паспрабавалі трапіць на базу праз палі, паліцыянты ўжылі сьлезацечны газ і вадамёты.
- 7 кастрычніка радыкальныя палестынскія групоўкі ХАМАС і «Ісламскі джыгад» напалі на поўдзень Ізраіля. Загінулі 1400 чалавек, каля 250 чалавек былі захоплены ў закладнікі і вывезены ў сэктар Газа. У адказ Ізраіль пачаў ваенную апэрацыю «Жалезныя мячы» і атакаваў Газу. У канцы кастрычніка Армія абароны Ізраілю зайшла на тэрыторыю сэктару, пачалася наземная апэрацыя.
- Па дадзеных падкантрольнага ХАМАС Міністэрства аховы здароўя Газы, па апошніх дадзеных, з прычыны нападаў Ізраілю колькасьць загінулых набліжаецца да 10 тысяч, уключаючы 4800 дзяцей. Незалежнага пацьверджаньня гэтым дадзеным няма.
- Палестынскі бок абвінавачвае Ізраіль у абстрэлах мірнага насельніцтва і грамадзянскай інфраструктуры. Армія абароны Ізраілю сьцьвярджае, што атакуе аб'екты ХАМАС, у тым ліку падземныя, якія разьмяшчаюцца ўнутры жылых раёнаў Газы.
- ААН і краіны Захаду заклікае бакі да больш хуткага спыненьня агню. Праваабаронцы зьвяртаюць увагу на гуманітарны крызіс у сэктары Газа.
