Пра гэта паведамляе прэсавая служба эстонскага ўраду.
Ва ўрадзе Эстоніі адзначылі, што гэтае выключэньне не азначае аўтаматычнага атрыманьня названымі катэгорыямі грамадзян дазволаў на жыхарства (ВНЖ). «Кожнае хадайніцтва будзе разгледжана асобна, у кожным выпадку ўлады будуць ацэньваць, ці ёсьць у чалавека падставы для атрыманьня дазволу на жыхарства», — адзначылі ў прэсавай службе ўраду.
Вынятак у санкцыйным рэжыме тычыцца тых людзей, якія здалі ўсе неабходныя іспыты па эстонскай мове або прайшлі эстонамоўную вучэбную праграму і валодаюць эстонскай мовай як мінімум на ўзроўні B2. У той жа час, як адзначылі ў прэсавай службе эстонскага ўраду, на акадэмічных работнікаў патрабаваньне валодаць мовай не распаўсюджваецца.
Цяпер у эстонскіх ВНУ навучаецца 298 грамадзянаў Расеі і Беларусі, на якіх распаўсюджваецца санкцыйны рэжым. Выключэньне, як удакладнілі ва ўрадзе, распаўсюдзіцца найперш на тых 78 студэнтаў, якія завяршаюць навучаньне па эстонамоўнай праграме.
Паводле зьвестак Дэпартамэнту здароўя Эстоніі, у 2022–2023 годзе ў краіне зарэгістраваныя дзесяць лекараў, якія прыбылі на працу з Расеі, і дзевяць — зь Беларусі. Што тычыцца навукоўцаў, то, паводле інфармацыі Міністэрства адукацыі і навукі Эстоніі, цяпер у эстонскіх ВНУ працуюць тры акадэмічныя работнікі, якія падпадаюць пад выключэньне з санкцый.
Эстонія спыніла выдачу дазволаў на жыхарства і кароткатэрміновых візаў з мэтай навучаньня для грамадзянаў Расеі і Беларусі летам 2022 году. Таксама грамадзянам Расеі і Беларусі абмежавалі магчымасьць атрымаць сэзонную працу, калі ў іх няма доўгатэрміновай нацыянальнай візы. Раней яны маглі атрымаць дазвол на кароткатэрміновае працаўладкаваньне па турыстычнай візе, выдадзенай у любой іншай краіне Шэнгенскай зоны.
Эстонія, Літва і Латвія раней дамовіліся абмежаваць уезд расейцаў у ЭЗ праз свае межы. Выключэньні будуць зробленыя толькі для кіроўцаў фураў, дыпляматаў і грамадзянаў, якія ўяжджаюць зь сямейных і гуманітарных прычын.
