Таксама ў МЗС Расеі паведамілі, што ведамства прыняла рашэньне «аб „люстраной“ высылцы з Расеі нямецкіх дыпляматаў і істотным абмежаваньні максымальнай колькасьці супрацоўнікаў нямецкіх дыпляматычных прадстаўніцтваў у краіне».
У расейскім МЗС сьцьвярджаюць, што была дамоўленасьць зь нямецкім бокам аб неафішаваньні інфармацыі аб высылцы, але Нямеччына нібыта парушыла гэтую дамоўленасьць праз «уцечку» інфармацыі ў СМІ.
У МЗС Нямеччыны пакуль афіцыйна не камэнтавалі гэту інфармацыю.
Нямецкае агенцтва dpa паведаміла, што 22 красавіка ў Бэрлін на некалькі гадзін прылятаў самалёт з Масквы, хоць паветраная прастора ЭЗ закрытая для расейскіх перавозчыкаў зь лютага 2022 году. Як піша dpa, у борта быў спэцыяльны дыпляматычны дазвол. Паводле сэрвісу flightradar24, самалёт з бартавым нумарам RA-96014 уваходзіць у склад спэцыяльнага лётнага атрада «Расея», які займаецца перавозкай вышэйшых службовых асобаў.
- 25 сакавіка нямецкае выданьне Focus паведаміла, што Нямеччына рыхтуецца выслаць з краіны больш за тры дзясяткі расейскіх дыпляматаў, бо нямецкія органы бясьпекі прыйшлі да высновы, што прадстаўнікі Расеі могуць выкарыстоўваць свой дыпляматычны імунітэт для вярбоўкі інфарматараў з мэтай сабатажу або распаўсюджваньня дэзінфармацыі.
- Пасьля ў МЗС Нямеччыны абверглі інфармацыю аб высылцы дыпляматаў, заявіўшы, што гэта мера «ў цяперашні момант не прадугледжана».
- У красавіку 2022 годзе Бэрлін аб'явіў пэрсонамі нон грата 40 расейскіх дыпляматаў. Расейскі бок адказаў на крок Бэрліна люстрана, выслаўшы ў канцы красавіка 40 супрацоўнікаў нямецкай дыпмісіі.