Галоўным героем фільму быў Юрась Зянковіч, асуджаны на 11 гадоў пазбаўленьня волі нібыта за спробу дзяржаўнага перавароту.
У фільме Юрась Зянковіч выглядаў моцна схуднелым. Верагодна, пад прымусам, агучваў нібыта дэталі пляну зрынаньня рэжыму Лукашэнкі.
Свабода кіруецца правілам не цытаваць выказваньні, невядома якім спосабам атрыманыя ад чалавека, які знаходзіцца ў зьняволеньні.
29 лістапада 2022 году Вярхоўны суд пакінуў прысуд фігурантам справы Зянковіча ў сіле:
- Юрасю Зянковічу — 11 гадоў калёніі,
- Аляксандру Фядуту — 10 гадоў,
- Рыгору Кастусёву — 10 гадоў,
- Дзянісу Краўчуку — 2,5 года.
Вольга Галубовіч, якую таксама пакаралі двума з паловай гадамі зьняволеньня, скаргі ў Вярхоўны суд не падавала.
Менскі абласны суд разглядаў справу аб «змове з мэтай захопу дзяржаўнай улады» з 29 ліпеня 2022 году. 5 верасьня 2022 году фігурантам агучылі прысуд.
Зянковіча абвінавацілі паводле ч. 1 арт. 357 КК («змова з мэтай захопу дзяржаўнай улады неканстытуцыйным шляхам»), ч. 1 арт. 361-1 КК («стварэньне экстрэмісцкага фармаваньня і кіраваньне ім»), ч. 3 арт. 361 КК («публічныя заклікі да захопу дзяржаўнай улады»), ч. 3 арт. 130 КК («распальваньне сацыяльнай варожасьці»).
Фядуту і Кастусёва — паводле ч. 1 арт. 357 КК («змова з мэтай захопу дзяржаўнай улады неканстытуцыйным шляхам»).
Галубовіч і Краўчука — паводле ч. 1 арт. 342 КК («актыўны ўдзел у групавых дзеяньнях, якія груба парушаюць грамадзкі парадак»).
Справу расьсьледаваў Камітэт дзяржаўнай бясьпекі Беларусі.
Фігурантамі справы былі таксама псыхіятар Дзьмітры Шчыгельскі, экс-супрацоўнік спэцпадразьдзяленьня МУС «Алмаз» Ігар Макар, а таксама Аляксандар Перапечка, Павал Кулажанка і Віталь Макаранка, якія жывуць за мяжой.
Пяцёх абвінавачаных затрымалі ў сярэдзіне красавіка 2021 году.
Лукашэнка раней заявіў, што абвінавачаныя нібыта рыхтавалі замах на яго і ягоных сыноў.
Летам 2024 году Рыгор Кастусёў выйшаў на волю па памілаваньні.
Форум