«Першай напісала 35-гадовая мянчанка, якая зьехала за мяжу ў кастрычніку 2020 году. Яна не паведаміла пра ўчыненыя ёю правапарушэньні ці злачынствы, а выказала толькі асьцярогі з прычыны яе магчымага дачыненьня да якіх-небудзь супрацьпраўных дзеяньняў. Пры гэтым не ўказала іншыя зьвесткі, неабходныя для такога звароту».
Анжаліка Курчак сказала, што пасьля дапаўненьня звароту згодна з указам Лукашэнкі заяўнік атрымае адказ. Пакуль жа зварот пакінулі без разгляду.
Сёньня ў другой палове дня тэлеканал Белсат паведаміў у сваім тэлеграм-канале, што Курчак цытавала ліст іх супрацоўніцы.
«Першай напісаць у камісію ў якасьці экспэрымэнту вырашыла рэдактарка нашага сайту Вольга Ярохіна (насамрэч ёй не 35, а 37 гадоў). У тэксьце звароту яна ня стала раскайвацца і папрасіла наведаць Беларусь аднойчы, а не вярнуцца назаўсёды», — напісаў Белсат.
