Служба дзяржаўнай бясьпекі Латвіі (СДБ) рэкамэндавала МУС уключыць экс-вядоўцу тэлеканалу «Дождь» Аляксея Карасьцялёва ў «чорны сьпіс» асобаў, якім забаронены ўезд у краіну, паведамляе партал LSM. lv.
Падставай для рэкамэндацыі сталі выказваньні Карасьцялёва аб забесьпячэньні расейскіх змабілізаваных, зробленыя ім 1 сьнежня ў перадачы «Тут і цяпер» на тэлеканале «Дождь». У СДБ вырашылі, што словы Карасьцялёва можна ацэньваць як заклік аказваць матэрыяльную падтрымку расейскім змабілізаваным, якія бяруць удзел у баявых дзеяньнях ва Ўкраіне.
У ведамстве, у прыватнасьці, адзначылі, што Аляксей Карасьцялёў у перадачы «Тут і цяпер» ня раз указваў, што вайскоўцы РФ на фронце знаходзяцца ў цяжкіх абставінах, недастаткова забясьпечаныя рыштункам і харчаваньнем. Выказваньні вядоўцы, на думку СДБ, сьведчаць, што «тэлеканал „Дождь“ абагульніў інфармацыю аб названых праблемах, каб дапамагчы іх вырашыць».
У СДБ таксама лічаць недапушчальным, каб «у латвійскай інфармацыйнай прасторы распаўсюджвалася інфармацыя з заклікам да грамадзтва аказваць дапамогу акупацыйным сілам РФ». У ведамстве мяркуюць, што выказваньні вядоўцы «Дождя» «супярэчаць інтарэсам нацыянальнай бясьпекі Латвіі і ствараюць ілжывае ўяўленьне аб арміі РФ, выклікаючы да яе спачуваньне».
Улічваючы, што ў Карасцьялёва няма латвійскага віду на жыхарства (вядоўца жыве ў Грузіі), пазваць яго да крымінальнай адказнасьці ў Латвіі нельга. Аднак СДБ рэкамэндуе МУС Латвіі ўключыць журналіста ў чорны сьпіс, фігурантам якога забаронены ўезд у краіну.
Таксама СДБ вынесла папярэджаньне галоўнаму рэдактару «Дождя» Ціхану Дзядко аб магчымай крымінальнай адказнасьці ў выпадку правапарушэньня, пад якім, як удакладняе выданьне, маецца на ўвазе збор і/ці перадача любых фінансавых ці іншых сродкаў на карысьць войска РФ у адпаведнасьці з артыкулам 77.2 Крымінальнага кодэксу Латвіі.
Між тым Управа грамадзянства і міграцыі Латвіі (PMLP), як паведамляе агенцтва LETA, зараз ацэньвае, ці ёсьць праўныя падставы ануляваць выдадзеныя візы з правам на працаўладкаваньне супрацоўнікам «Дождя», зважаючы на тое, што кампанія пакуль не зьліквідаваная. Ва Ўправе адзначылі, што раней 13 супрацоўнікам тэлеканалу былі выдадзеныя працоўныя візы.
Тым часам генэральны дырэктар «Дождя» Натальля Сіндзеева апублікавала відэа, у якім заклікала Аляксея Карасьцялёва вярнуцца на працу. Яна таксама папрасіла прабачэньня ў Карасьцялёва і заявіла, што яго звольнілі «за памылку» і што рашэньне аб звальненьні было «подласьцю» ў дачыненьні да вядоўцы.
Генэральная дырэктарка «Дождя» заклікала вярнуцца на тэлеканал вядоўцаў Маргарыту Лютаву і Ўладзіміра Раменскага, якія вырашылі сысьці на знак пратэсту супраць звальненьня Карасьцялёва.
«Хлопцы, вяртайцеся на „Дождь“. Гэта была памылка, ніякага злога намеру. Была вельмі дрэнная памылка. Украінцы нам могуць гэтага не дараваць, але гэта была памылка. Людзі робяць памылкі», — сказала Сіндзеева.
Раней стала вядома, што Нацыянальная рада электронных сродкаў масавай інфармацыі (NEPLP) Латвіі анулявала ліцэнзію на трансьляцыю тэлеканалу «Дождь» у Латвіі. Рашэньне скасаваць дазвол на трансьляцыю тэлеканалу прынялі «ў сувязі з пагрозай нацыянальнай бясьпецы і грамадзкаму парадку». Трансьляцыя тэлеканалу ў Латвіі будзе спыненая 8 сьнежня. Акрамя гэтага, на тэрыторыі Латвіі будзе закрыты доступ да праграмаў тэлекампаніі на Ютубе.
Галоўны рэдактар «Дождя» Ціхан Дзядко — аб звальненьні Аляксея Карасьцялёва:
Другога сьнежня стала вядома, што NEPLP Латвіі аштрафаваў тэлеканал «Дождь» на 10 тысяч эўра за мапу з Крымам у складзе Расеі і словы «наша армія» пра расейскую армію. Кіраўнік ведамства Абаліньш паведаміў, што ў тэлеканалу былі два істотныя парушэньні, але не ўдакладніў, якім было першае. Ён адзначыў, што за тры такія парушэньні NEPLP можа ануляваць дазвол на трансьляцыю.
Супраць «Дождя» ў Латвіі таксама завялі справу аб адміністрацыйным правапарушэньні за сюжэт, у якім гаворыцца аб магчымай падтрымцы расейскай арміі. Тэлеканал паведаміў, што вядоўца Аляксей Карасьцялёў звольнены. Галоўны рэдактар «Дождя» Ціхан Дзядко заявіў, што тэлеканал «не займаўся, не займаецца і ня будзе займацца дапамогай з аснашчэньнем расейскай арміі».
«Дождь» працаваў у Расеі з 2010 году. Пачаўшы эфір з забаўляльнага зьместу, ён хутка пераключыўся на грамадзка-палітычны парадак дня. Пасьля гэтага ён быў выключаны з расейскіх кабэльных і спадарожнікавых апэратараў. У 2017 годзе яго заблякавалі ва Ўкраіне.
У 2021 годзе ў Расеі ён быў аб’яўлены «іншаземным агентам», рэдакцыя з гэтым не пагадзілася. 1 сакавіка 2022 году, праз тыдзень пасьля пачатку расейскага ваеннага ўварваньня ва Ўкраіну, Генэральная пракуратура Расеі запатрабавала заблякаваць сайт «Дождя» з прычны «фэйкаў аб дзеяньнях расейскай арміі і заклікаў да экстрэмісцкіх дзеяньняў».
3 сакавіка канал прыпыніў працу. Дазвол на трансьляцыю ў Латвіі тэлеканал атрымаў 6 чэрвеня.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
