Увечары 21 кастрычніка на прадпрыемстве «Гродна Азот» спынілі працу двух цэхаў: аміяк-3 і карбамід-3.
На прадпрыемстве інфармавалі, што прымаюцца меры па аднаўленьні вытворчасьці, а таксама адсочваецца якасьць паветра.
Прыпыненьне цэху аміяк-3 тлумачаць «тэхналягічнымі прычынамі», а цэху карбамід-3 — «аптымізацыяй балянсу вытворчага працэсу».
«Пры правядзеньні прыпыначных і пускавых апэрацый у цэху аміяк-3 з мэтай утылізацыі гаручых рэчываў, якія ўваходзяць у склад тэхналягічнага газу, рэглямэнтам прадугледжана яго спальваньне на факельнай устаноўцы», — гаворыцца ў паведамленьні адміністрацыі прадпрыемства.
Пры гэтым, як сьцьвярджаецца, праводзіцца кантроль якасьці паветра на тэрыторыі і па пэрымэтры прадпрыемства, а таксама на мяжы санітарна-ахоўнай зоны з улікам напрамку ветру. Адміністрацыя «Гродна Азоту» заяўляе, што пагрозы гораду, экалёгіі, жыхарам і работнікам прадпрыемства няма.
