«Мы прымаем рашэньне аб пачатку працэдуры наданьня Рэспубліцы Беларусь статусу паўнапраўнага чальца ШАС», — заявіў 16 верасьня на саміце ў Самаркандзе прэзыдэнт Узбэкістану Шаўкат Мірзіёеў, які старшынюе ў арганізацыі. Яго цытуе БелТА.
Зь візытам у Самаркандзе знаходзіцца і Аляксандар Лукашэнка. Але на асноўным паседжаньні яго не было, яго запрасілі і далі слова на паседжаньне саміту ў пашыраным складзе.
Гаворачы аб прыярытэтах Беларусі ў ШАС, Лукашэнка згадаў заходнія санкцыі за вайну Расеі супарць Украіны і саўдзел у гэтым уладаў Беларусі:
«Незаконныя санкцыі, адключэньне ад міжнародных разьлікаў, іншыя нелегітымныя абмежаваньні вядуць да неабходнасьці зббліжэньня плацёжных сыстэм, павелічэньня долі нацыянальных валют у гандлі, а таксама стварэньня ўласных фінансавых мэханізмаў у рамках ШАС. Гэты падыход дасьць ня толькі свабоду выбару, але і свабоду дзеяньняў».
«Я абсалютна падтрымліваю выказанае тут старшынёй КНР Сі Цзіньпінам меркаваньне аб процідзеяньні ўмяшаньню пэўных краін ва ўнутраныя справы дзяржаў і процідзеяньню каляровым рэвалюцыям», — заявіў Лукашэнка.
Лукашэнка падтрымаў ідэю Пуціна, каб ШАС праводзіла свае спаборніцтвы па летніх алімпійскіх відах спорту ў 2024 годзе і па зімовых — у 2026 годзе. Расею і Беларусь адхілілі ад большасьці міжнародных спаборніцтваў з-за нападу на Ўкраіну.
У ліпені 2022 году Беларусь падала заяўку на ўступленьне ў Шанхайскую арганізацыю супрацоўніцтва.
Што такое ШАС?
ШАС — міжурадавая міжнародная арганізацыя, заснаваная 15 чэрвеня 2001 году ў Шанхаі. Асноўнымі мэтамі дэкляраваны ўмацаваньне ўзаемнага даверу і добрасуседзтва паміж краінамі-ўдзельніцамі і садзейнічаньне іх эфэктыўнаму супрацоўніцтву ў палітычнай, гандлёва-эканамічнай, навукова-тэхнічнай і культурнай галінах. Чальцамі ШАС зьяўляюцца Індыя, Казахстан, КНР, Кіргізстан, Пакістан, Расея, Таджыкістан, Узбэкістан.
Беларусь разам з Афганістанам, Іранам і Манголіяй маюць статус дзяржаў-назіральніц. Яшчэ шэсьць краін — Азэрбайджан, Армэнія, Камбоджа, Нэпал, Турэччына і Шры-Лянка — застаюцца партнэрамі па дыялёгу ШАС.
Місія Шанхайскай арганізацыі супрацоўніцтва рэгулярна называлі выбары ў Беларусі «празрыстымі, сапраўднымі і дэмакратычнымі».
