19 лютага прайшлі спрэчкі бакоў. Абвінавачваньне палічыла даказанай віну загінулага Генадзя Шутава ў супраціве, а Аляксандра Кардзюкова — у супраціве з ужываньнем гвалту і замаху на забойства асобы, якая выконвае абавязкі па ахове грамадзкага парадку, паведамляе Tut.by.
Пракурор просіць для Кардзюкова 10 гадоў пазбаўленьня волі ў калёніі ўзмоцненага рэжыму. Шутава, які памёр ад раненьня ў галаву, пракурор просіць прызнаць вінаватым у супраціве — і вынесьці прысуд без прызначэньня пакараньня.
- 16 лютага ў Берасьці пачаўся судовы працэс у справе Аляксандра Кардзюкова і Генадзя Шутава, які загінуў ад агнястрэльнага раненьня, атрыманага 11 жніўня на вуліцы Маскоўскай у Берасьці. Кардзюкоў і загінулы Шутаў на працэсе зьяўляюцца абвінавачанымі.
- Аляксандра Кардзюкова абвінавачваюць у замаху на забойства вайскоўца (той падчас пратэстаў быў у цывільным). Кардзюкоў кажа, што ўсё было ня так, як пададзена ў абвінавачваньні.
- Пацярпелымі выступаюць вайскоўцы сілаў спэцыяльнага рэагаваньня (вайсковая частка № 89417 сілаў спэцыяльных апэрацый) Раман Гаўрылаў і Арсеній Галіцын.
- Паводле вэрсіі сьледзтва, у Шутава і Кардзюкова ўзьнік канфлікт з вайскоўцамі Гаўрылавым і Галіцыным, якія былі ў цывільным і мелі пры сабе пісталеты Макарава. Гаўрылаў, абараняючыся, спачатку стрэліў у паветра, а потым вырашыў стрэліць у Шутава, «у вобласьць левага перадплечча», але ня змог сканцэнтравацца пасьля ўдару па галаве і трапіў Шутаву ў патыліцу. Кардзюкоў адкінуў вэрсію, што першым нападаў з трубой на вайскоўцаў.
- Падчас паседжаньня стала вядома, што загад выкарыстаць узброеных вайскоўцаў (у падпарадкаваньні берасьцейскага АМАПу) падчас пратэстаў аддаў камандуючы войскамі Сілаў спэцыяльных апэрацый Беларусі генэрал-маёр Вадзім Дзенісенка.
Ахвяры беларускіх пратэстаў. Што важна ведаць
За ўвесь час пратэстаў пры розных абставінах загінулі сама меней 4 чалавекі. Пры гэтым улады і кіраўніцтва МУС ні разу не прызналі, што людзі загінулі ад рук сілавікоў. Гэтыя людзі на сёньня лічацца ахвярамі пратэстаў:
- Аляксандар Тарайкоўскі, 34 гады, Менск, застрэлены сілавікамі на вуліцы Прытыцкага;
- Аляксандар Віхор, 25 гадоў, Гомель, памёр пасьля зьбіцьця ў міліцыі;
- Генадзь Шутаў, 43 гады, Берасьце, застрэлены сілавіком;
- Раман Бандарэнка, 31 год, Менск, пабіты да непрытомнасьці, памёр у шпіталі.
Таксама дагэтуль невядомыя абставіны сьмерці яшчэ некалькіх чалавек. Іх сваякі і сябры лічаць, што яны маглі быць забітыя падчас пратэстаў.
- Мікіта Крыўцоў, 28 год, Жодзіна, знойдзены павешаным;
- Аляксандар Дзямідаў, 25 гадоў, Бараўляны, знойдзены мёртвым;
- Канстанцін Шышмакоў, 29 гадоў, Ваўкавыск, нібыта ўчыніў самагубства;
- Арцём Парукаў, 19 гадоў, Менск, зьбіты машынай.
