Гэта першае абвінавачаньне, дзе сьцьвярджаецца, што акцыя супраць амэрыканскага парлямэнту рыхтавалася загадзя.
Трое абвінавачаных, чальцы праварадыкальнай ваенізаванай групы Oath Keepers, былі ў ліку некалькіх соцень чалавек, якія ўварваліся ў памяшканьне Капітолія 6 студзеня. У аснове абвінаваўчага заключэньня — электронная перапіска і відэазапісы таго, што адбылося 6 студзеня на Капіталійскім пагорку.
«У нас добрая група — 30-40 чалавек. Мы трымаемся разам і прытрымліваемся пляну», — такая цытата прыводзіцца ў абвінаваўчым заключэньні. Паводле абвінавачаньня, у яго распараджэньні ёсьць відэазапіс, на якім дзесяць чалавек у ахоўных шлемах і куленепрабівальных камізэльках з эмблемамі Oath Keepers узначальваюць натоўп, які ідзе да ўсходняга ўваходу ў Капітолій.
Кіраваў дзеяньнямі гэтай групы, згодна з пракуратурай, 65-гадовы Томас Колдвэл. Падчас нападу, як сьцьвярджае пракуратура, ён атрымаў некалькі паведамленьняў, якія сьведчаць аб тым, што змоўцы, магчыма, плянавалі атаку на заканадаўцаў.
«Усе члены знаходзяцца ў тунэлях пад Капітоліем. Зачыні іх. Адкрый газ», — гаворыцца ў адным з паведамленьняў. «Том, усе заканадаўцы ў тунэлях трыма паверхамі ніжэй», — паведамляе Колдвэлу іншы чалец групы. На сваёй старонцы ў Facebook Колдвэл пазьней напісаў: «Мы штурмуем замак... Я выдатны падбухторшчык».
У аўторак падчас першага зьяўленьня перад судзьдзём Колдвэл заявіў, што «ўсе да аднаго абвінавачаньні лжывыя».
За два тыдні, якія прайшлі пасьля атакі на будынак Капітолія, падчас якога натоўп пратэстоўцаў уварваўся ў памяшканьне Кангрэсу, дзе Палата прадстаўнікоў і Сэнат зацьвярджалі вынікі прэзыдэнцкіх выбараў, сьледзтва завяло крымінальныя справы на больш як 100 чалавек. Аднак гэта першыя абвінавачаньні, у якіх сьцьвярджаецца, што напад мог плянавацца загадзя.
