Святлана Ціханоўская падчас свайго візыту ў Нямеччыну, дзе яна сустрэлася з прэзыдэнтам Франкам-Вальтэрам Штайнмаерам, дала інтэрвію «Нямецкай хвалі».
Раней мы былі ўпэўненыя, што справімся самі, але бачым, што рэжым занадта моцны і нам патрэбна дапамога, заявіла між іншага яна.
— На якую канкрэтна дапамогу вы разьлічваеце?
— На розную. Нам цяпер важная любая дапамога. Стала відавочна, што гвалт рэжыму ня ведае межаў, ён не цураецца ніякіх спосабаў ціску на звычайных людзей. Улады ператварыліся ў тэрарыстычныя арганізацыі, якія трымаюць у страху ўвесь беларускі народ. І нам патрэбна дапамога як унутры Беларусі, каб падтрымаць людзей, якія цярпяць пастаянны прэсінг з боку рэжыму, так і за межамі краіны — я маю на ўвазе міжнародны ціск.
— Лех Валэнса сказаў, што вам трэба весьці перамовы ў першую чаргу з Расеяй, і патрэбныя людзі, якія ўмеюць весьці такія перамовы. Як вы ставіцеся да парады былога першага лідэра прафсаюза «Салідарнасьць» і прэзыдэнта Польшчы?
— Мы з самага пачатку гаварылі пра перамовы, мы да гэтага заклікалі, мы шукалі розныя спосабы пачаць такія перамовы, мы шмат разоў зьвярталіся да Расеі, кажучы, што мы адкрытыя да дыялёгу. Мы зьвярталіся да Эўразьвязу, да АБСЭ з просьбай прадставіць плятформу для такіх перамоваў.
Мы разумеем, што прадстаўнікі Расейскай Фэдэрацыі як нашы найбліжэйшыя суседзі абавязкова павінны быць за сталом перамоваў, гэтак жа сама, як Украіна, Літва, Польшча і ўсе лідэры дэмакратычных краін, каб разумець, пра што мы там гаворым. Мы ня хочам дзесьці там у кулюарах пра нешта дамаўляцца. Гэта павінна быць адкрыта. І ня трэба казаць, што толькі Расея павінна вырашаць, што будзе зь Беларусьсю, самі беларусы павінны вызначаць свой лёс.
— Але з Масквы хоць нейкія сыгналы паступаюць? Хоць нейкія кантакты ёсьць?
— Афіцыйных кантактаў з Расеяй у нас не было. На вялікі жаль.
Хто такая Сьвятлана Ціханоўская?
Сьвятлана Ціханоўская — беларускі палітык, былая кандыдатка ў прэзыдэнты Беларусі. Цяпер знаходзіцца ў Літве.
- Сьвятлана Ціханоўская нарадзілася ў 1982 годзе ў Мікашэвічах (Берасьцейская вобласьць).
- 15 траўня 2020 году пасьля адмовы Цэнтральнай выбарчай камісіі зарэгістраваць мужа Сьвятланы, зьняволенага лідэра кампаніі «Страна для жизни» блогера Сяргея Ціханоўскага, Сьвятлана ад свайго імя падала дакумэнты на рэгістрацыю ініцыятыўнай групы. 20 траўня яе групу зарэгістравалі. 29 траўня кіраўніка яе выбарчага штабу Сяргея арыштавалі зноў.
- Кандыдаткай у прэзыдэнты Ціханоўскую зарэгістравалі 14 ліпеня 2020.
- Пасьля арышту прэтэндэнта на пасаду прэзыдэнта Віктара Бабарыкі і ўцёкаў за мяжу яшчэ аднаго прэтэндэнта Валера Цапкалы іх штабы аб’ядналіся з штабам Сьвятланы Ціханоўскай. Аб’яднаны штаб правёў пасьпяховую выбарчую кампанію з шматтысячнымі мітынгамі ў вялікіх і малых гарадах Беларусі пад бел-чырвона-белымі сьцягамі.
- Паводле афіцыйных зьвестак ЦВК, на выбарах Сьвятлана Ціханоўская набрала 10,09%, а Аляксандар Лукашэнка — 80,08%. Ціханоўская адмовілася прызнаць гэтыя вынікі і 10 жніўня асабіста накіравалася ў ЦВК, каб іх абскардзіць.
- З ЦВК палітык не вярнулася. Сувязь зь ёю зьнікла, празь некалькі гадзін у вэстыбюлі ЦВК яна паведаміла, што «прыняла рашэньне» і зьехала ў невядомым кірунку. 11 жніўня стала вядома, што яна ў Літве. Былі апублікаваныя два відэазвароты Ціханоўскай, адзін зь якіх быў запісаны ў ЦВК пасьля размовы з двума высокапастаўленымі сілавікамі, у ім Ціханоўская заклікае дэманстрантаў не выходзіць на вуліцы. Кіраўніцтва Літвы 11 жніўня заявіла, што звароты Ціханоўская запісала пад ціскам і шантажом.
- Празь некалькі дзён пасьля фактычнай «дэпартацыі» ў Літву Сьвятлана Ціханоўская заявіла, што бярэ на сябе ролю «нацыянальнага лідэра».
- 18 жніўня з ініцыятывы Сьвятланы Ціханоўскай у Беларусі была створаная Каардынацыйная рада для транзыту ўлады.
- 10 верасьня 2020 Сэйм Літвы прагаласаваў за прызнаньне Сьвятланы Ціханоўскай абраным кіраўніком Беларусі.
- Ад верасьня 2020 году Ціханоўская наведала з працоўнымі візытамі дзясяткі краін сьвету і сустрэлася зь іх лідэрамі. Сярод іх прэзыдэнт Францыі Эманюэль Макрон, канцлер Нямеччыны Ангела Мэркель, высокі прадстаўнік ЭЗ Жузэп Бурэль, прэзыдэнт ЗША Джо Байдэн ды інш.
- Сьвятлана Ціханоўская кантактавала з актыўнымі людзьмі ў Беларусі падчас пратэстаў 2020 і 2021 гадоў, прызначыла сваіх прадстаўнікоў для падтрыманьня лучнасьці з сацыяльнымі і прафэсійнымі групамі ў краіне.
- Ціханоўская выступіла за правядзеньне ў Беларусі новых празрыстых прэзыдэнцкіх выбараў пры міжнародным кантролі і актыўна заклікала міжнародную супольнасьць да ўдзелу ў арганізацыі перамоваў зь цяперашнім кіраўніцтвам Беларусі.
- За два гады Ціханоўская, яе штаб і зьвязаныя з ёй ініцыятывы дапамагалі палітвязьням, выступалі з шэрагам гуманітарных і палітычных ініцыятываў.
- Яна выступала супраць сфальшаванага канстытуцыйнага рэфэрэндуму, ініцыяванага Лукашэнкам у 2022 годзе.
- У лютым 2022 Ціханоўская асудзіла расейскую агрэсію супраць Украіны і саўдзел у ёй рэжыму А. Лукашэнкі, у сакавіку 2022 году стварыла беларускі Антываенны рух.
- У красавіку 2022 году Ціханоўская на канфэрэнцыі Рады Бясьпекі ААН заявіла, што «поўдзень Беларусі фактычна знаходзіцца пад расейскай акупацыяй».
- Ціханоўская правяла пасьпяховыя перамовы з урадам Польшчы і дамаглася асаблівых умоваў для прыезду і легалізацыі беларусаў, ня згодных з рэжымам Лукашэнкі.
- У жніўні 2022 году Сьвятлана Ціханоўская стварыла Аб’яднаны пераходны кабінэт, назвала чатырох сваіх прадстаўнікоў.
- У лістападзе 2022 Ціханоўская ўпершыню назвала сябе прэзыдэнтам-электам
