Абраны прэзыдэнт Злучаных Штатаў Дональд Трамп у чацьвер аб’явіў аб вылучэньні Робэрта Кенэдзі-малодшага на пасаду кіраўніка Міністэрства аховы здароўя і сацыяльных службаў.
«Бясьпека і здароўе ўсіх амэрыканцаў — найважнейшая задача любой адміністрацыі, і Міністэрства аховы здароўя і сацыяльных службаў адыграе вялікую ролю ў абароне людзей ад шкодных хімікатаў, забруджвальнікаў, пэстыцыдаў, фармацэўтычных прадуктаў і харчовых дабавак, якія прывялі да сур’ёзнага крызісу здароўя ў нашай краіне», — напісаў Трамп на плятформе Truth Social.
Міністэрства аховы здароўя і сацыяльных службаў адказвае за працу Ўпраўленьня санітарнага нагляду за якасьцю харчовых прадуктаў і мэдыкамэнтаў (FDA), Цэнтраў кантролю і прафіляктыкі захворваньняў (CDC), Нацыянальных інстытутаў аховы здароўя (NIH), а таксама праграм Medicare і Medicaid, якія забясьпечваюць мэдыцынскае страхаваньне для маламаёмных, асобаў, старэйшых за 65 гадоў, і інвалідаў.
Зь бюджэтам у 3,09 трлн даляраў на 2024 фінансавы год, што складае 22,8% фэдэральнага бюджэту, Міністэрства аховы здароўя адыгрывае ключавую ролю для дзясяткаў мільёнаў амэрыканцаў.
Кенэдзі, сын сэнатара Робэрта Кенэдзі і пляменьнік прэзыдэнта Джона Кенэдзі, удзельнічае ў пераходнай камандзе Трампа, разглядаючы рэзюмэ кандыдатаў на ключавыя пасады ў дзяржаўных структурах, якія адказваюць за ахову здароўя. Раней Кенэдзі агучваў свае прыярытэты: барацьбу з эпідэміяй хранічных захворваньняў, такіх як атлусьценьне, дыябэт і аўтызм, а таксама скарачэньне колькасьці хімікатаў у прадуктах харчаваньня.
Нягледзячы на высокі ўзровень выдаткаў на ахову здароўя і фармацэўтыку, амэрыканцы менш здаровыя ў параўнаньні з жыхарамі іншых заможных краін, гаворыцца ў справаздачы Commonwealth Fund за 2023 год, якую цытуе «Голас Амэрыкі».
Кенэдзі таксама заявіў, што мае намер скараціць штат FDA і правесьці кадравую чыстку ў Нацыянальных інстытутах аховы здароўя.
«Вайна FDA супраць грамадзкай аховы здароўя хутка скончыцца», — напісаў ён у кастрычніку ў сацсетцы X, дадаўшы, што гэта тычыцца агрэсіўнага падаўленьня прымяненьня псыхадэлікаў, пэптыдаў, ствалавых клетак, непастэрызаванага малака, сонечнага сьвятла і іншых сродкаў.
Кенэдзі неаднаразова крытыкавалі за яго пазыцыю адносна прышчэпак (ён зьвязвае іх з ростам аўтызму сярод дзяцей). Яго таксама абвінавачвалі ў распаўсюдзе дэзынфармацыі падчас пандэміі COVID-19.
Сам Кенэдзі ня згодны зь ярлыком «антываксэра». Ён адзначае, што толькі патрабуе больш строгіх тэстаў вакцынаў.
Форум