Міністэрства фізычнай культуры і спорту Ўзбэкістану з 1 ліпеня 2021 году мае намер укараніць маніторынг залішняй вагі чыноўнікаў у онлайн-рэжыме на аснове складзенага рэйтынгу, піша ўзбэцкая служба Радыё Свабода.
Перад гэтым у ведамстве плянуюць распрацаваць крытэрыі ацэнкі ўзроўню залішняй вагі кіраўнікоў і супрацоўнікаў дзяржорганаў.
Прадстаўнікі міністэрства паведамілі, што з наступнага навучальнага года фізкультура будзе выкладацца ва ўсіх клясах па дзьве гадзіны на тыдзень, а ў дзяржаўных органах і арганізацыях увядуць спэцыяльныя перапынкі для заняткаў гімнастыкай.
Прэзыдэнт Узбекістану Шаўкат Мірзіёеў у сакавіку 2019 году даў міліцыянтам з залішняй вагой паўгода на тое, каб пахудзець. «Нам не патрэбны афіцэр, супрацоўнік органаў унутраных спраў з залішняй вагой. Як у такім стане ён зможа лавіць злачынцаў? Хай займаецца спортам», — сказаў тады Мірзіёеў.
У лістападзе сёлета Мірзіёеў падпісаў указ, які прадугледжвае разьвіцьцё масавага спорту сярод насельніцтва. Прыярытэтнымі відамі спорту стануць хада, бег, міні-футбол, роварны спорт, бадмінтон, стрытбол.
