У Вене распусьцяць дзьве мячэці, якія наведваў зламысьнік, што застрэліў чатырох чалавек у цэнтры аўстрыйскай сталіцы. Пра гэта паведаміла міністарка па справах інтэграцыі Сюзанэ Рааб, перадае Reuters.
Аўстрыйскія ўлады мяркуюць, што абедзьве мячэці былі асяродкамі радыкальнай плыні ісламу, якой прытрымліваўся нападнік. У пятніцу, 6 лістапада, у мячэцях прайшлі ператрусы. Рааб падкрэсьліла, што дзеяньні ўладаў — не атака на рэлігію.
У сваю чаргу, міністар унутраных спраў Аўстрыі Карл Нехамэр заявіў на прэс-канфэрэнцыі, што Вена прызнала недапушчальныя памылкі пры апрацоўцы інфармацыі выведкі, атрыманай ад спэцслужбаў Славаччыны.
Напад у Вене адбыўся ўвечары 2 лістапада. Узброены чалавек на працягу некалькіх хвілін страляў у мінакоў, наведнікаў кавярні і паліцэйскіх у цэнтры аўстрыйскай сталіцы. Самога нападніка застрэліла паліцыя. Ім аказаўся 20-гадовы Куйцім Фэйзулай, уладальнік пашпартоў Аўстрыі і Паўночнай Македоніі. Улады кваліфікуюць здарэньне як тэракт.
Па справе аб датычнасьці да злачынства ў Аўстрыі затрымалі 15 чалавек. Пракуратура Вены настойвае на арышце яшчэ васьмёх.
Паліцыя Нямеччыны ў пятніцу, 6 лістапада, правяла ператрусы ў дамах і офісах чатырох чалавек, якія меркавана былі зьвязаныя зь венскім ісламістам.
Летась у красавіку Фэйзулая асудзілі на 22 месяцы пазбаўленьня волі — за спробу зьехаць у Сырыю, каб далучыцца да ўзброеных атрадаў тэрарыстычнай групоўкі «Ісламская дзяржава». З турэмнага тэрміну, прызначанага яму прысудам, ён адседзеў толькі восем месяцаў і быў вызвалены ў сьнежні мінулага году.
Па словах кіраўніка МУС, Фэйзулай быў удзельнікам праграмы «дэрадыкалізацыі». Але, нягледзячы на гэта і на ўсе зьнешнія прыкметы паступовай інтэграцыі ў аўстрыйскае грамадзтва, экстрэміст перасьледаваў свае, супрацьлеглыя мэты.
