2 лістапада суд Заводзкага раёну Менску арыштаваў праваабаронцу і незалежную журналістку Марыну Кастылянчанку на 15 дзён. Яе абвінавацілі ў незаконным пікетаваньні на вуліцы Багдановіча 30 кастрычніка і супраціве міліцыі.
Кастылянчанка назвала абвінавачаньні абсалютнай выдумкай. Яна сказала, што а 18-й гадзіне сустрэла свайго сябра Аляксандра Бялова пасьля арышту на Акрэсьціна, а ўжо ў 18:45 іх затрымалі ў кавярні на вуліцы Сурганава.
«Я лічу, што гэта палітычны перасьлед за мае палітычныя погляды», — сказала яна.
Праваабаронцы назвалі затрыманьне Марыны Кастылянчанкі адвольным і незаконным.
Акрамя Марыны Кастылянчанкі, у кавярні затрымалі
- Карыну Гараўскую,
- Марыю Шаблінскую,
- Аляксандра і Натальлю Сінкавец,
- Уладзіслава Машчука,
- Аляксандра Бялова,
- Уладзімера Ларыёнава.
Усіх 2 лістапада арыштавалі на 15 дзён.
У той жа дзень у Судзе Фрунзенскага раёну на 15 дзён арыштавалі журналіста БелаПАН Паўла Дабравольскага. Судзьдзя Юлія Блізьнюк палічыла яго вінаватым ва ўдзеле ў несанкцыянаваным мітынгу 18 кастрычніка.
3 лістапада на 13 сутак арыштавалі фатографа Аляксандра Зяньковіча, паведаміла «Наша ніва».
Ад пачатку году Беларуская асацыяцыя журналістаў зафіксавала больш як 400 выпадкаў перасьледу журналістаў за іх прафэсійную дзейнасьць. Адзначана пашкоджаньне і канфіскацыя тэхнікі, затрыманьні, зьбіваньне, страляньне гумовымі кулямі, штрафы, адміністрацыйныя арышты за «ўдзел у мітынгах» і «непадпарадкаваньне законным патрабаваньням міліцыі», крымінальныя справы.
Рэпрэсіі супраць пратэстоўцаў і журналістаў. Што важна ведаць
- Праваабаронцы «Вясны» задакумэнтавалі больш за 500 сьведчаньняў катаваньняў.
- Больш за 30 000 чалавек былі затрыманыя.
- На пратэстоўцаў завялі больш за 900 крымінальных спраў.
- Журналісты ў Беларусі адседзелі ўжо больш за 500 дзён адміністрацыйнага арышту.
- Зафіксавана больш за 400 парушэньняў правоў журналістаў.
- У краіне 144 палітычныя вязьні.
