Фатограф газэты «Новы Час» Дзьмітрый Дзьмітрыеў Партызанскім раённым судом Менска асуджаны на 10 сутак арышту.
Такое рашэньне прыняла 2 лістапада судзьдзя Натальля Дзядкова, паведамляе Беларуская асацыяцыя журналістаў (БАЖ). Дзьмітрыева затрымалі 1 лістапада падчас асьвятленьня ў Менску Марша супраць тэрору.
У дачыненьні да яго склалі адміністрацыйныя пратаколы за непадпарадкаваньне патрабаваньням супрацоўнікаў міліцыі (арт. 23.4 КаАП) і ўдзел у несанкцыянаванай акцыі (арт. 23.34 КаАП).
Паводле інфармацыі БАЖ, за апошні месяц Дзьмітрыева ўжо чатыры разы затрымлівалі падчас працы.
Акрамя Дзьмітрыева падчас учорашняга маршу было затрымана яшчэ шэсьць журналістаў: Дзьмітрый Солтан (Буянаў) і Зьміцер Краўчук (апэратары тэлеканалу «Белсат»), Аляксандр Зяньковіч і Яна Трусіла (фотакарэспандэнты газэты «Новы Час»), Юры Шамшур (расейскае інфармагенцтва ТАСС) і Алёна Ляшкевіч (карэспандэнт «Новага Часу»). Шамшура і Ляшкевіч адпусьцілі неўзабаве пасьля затрыманьня.
