Міністэрства юстыцыі ЗША інфармавала, што 8 сьнежня пакараюць сьмерцю Лізу Мантгомэры. Калі сьмяротны прысуд будзе выкананы, ён стане першым фэдэральным пакараньнем сьмерцю жанчыны ў ЗША за амаль сем дзесяцігодзьдзяў, паведамляе «Голас Амэрыкі».
Ліза Мантгомеры была асуджаная на сьмяротнае пакараньне за забойства, зьдзейсьненае ў 2004 годзе: яна задушыла цяжарную жанчыну.
Апошні раз пакараньне сьмерцю жанчыны пад фэдэральнай юрысдыкцыяй ЗША адбылося ў 1953 годзе – гэта калі сьмяротны прысуд выносіць ня суд штату, а фэдэральны суд.
Міністэрства юстыцыі таксама паведаміла, што 10 сьнежня будзе пакараны сьмерцю Брэндан Бэрнар, за забойства двух сьвятароў у 1999 годзе.
Адміністрацыя Дональда Трампа аднавіла фэдэральныя сьмяротныя пакараньні пасьля 17-гадовага перапынку.
